تەنیا ٥٨ ژینگەپارێزو پۆلیسی دارستان، ئەركی چاوەدێریو كۆنتڕۆڵ كردنی ٢٧٠ هەزار هێكتار لە سەرچاوە سرووشتییەكانی كرماشانیان پێ ئەسپێردراوە.
بەهادۆر چراغی، فەرماندەی یەگانی پاراستنی ئیدارەی گشتیی ژینگەپارێزیی پارێزگای كرماشان دەڵێ تەنیا ٥٨ پۆلیس دارستان هەن كە خەریكی كۆنتڕۆڵكردنی ٢٧٠ هەزار هێكتار لە سەرچاوە سروشتییەكانی ئەم پارێزگایەن، ئەوە لە حاڵێكدایە كە بەپێی ستانداردەكان بۆ چاوەدێری كردنی ئەم پانتاییە لە سەرچاوە سرووشتییەكان، هەرنەبێ پێویستە ٢٧٠ پۆلیسی دارستان دابمەزرێنن.
بە قسەی ناوبراو، تا ٦ مانگ لەمەوبەر تەنیا ٣٠ پارێزەری ژینگە، ئەرکی پاراستنی ٢٧٠ هەزار هێكتار لە سەرچاوە سرووشتییەكانی پارێزگای كرماشانیان لە ئەستۆ بوو كە لەم دواییانەدا ٢٨ كەسی دیكەشیان بۆ ئەم كارە دامەزراندووە.
فەرماندەی یەگانی پاراستنی ئیدارەی گشتیی ژینگەپارێزیی پارێزگای كرماشان لە درێژەی قسەكانیدا گوتی: ئەم ژینگەپارێزانە لە بارودۆخێكی دژواردا کار دەکەنو ئەرکیان زۆر قورسەو لانیکەمی مووچەو حەقدەستیان دەدرێتێ.
ناوبراو دەڵێ لە حاڵی حازردا بەپێی قانوونەكانی ئێران لانیكەمی هەقدەست لەم وڵاتە ٧١٢ هەزار تمەنە.
