دەوڵەت دەڵێ لێدانی ئوتوبانی کرماشان _ هەمەدان ٣٠٠٠ میلیارد تمەنی پێویستە، بەڵام ئەوە لە توانای دەوڵەتدا نیەو؛ دەوڵەت چاوەڕوانە بەشکم کەرتی تایبەت جێبەجێکردنەکەی بگرێتە ئەستۆ.
موجتەبا نیککردار، جێگری بەشی ئاوەدانکردنەوەی پارێزگاری کرماشان وێڕای پشتڕاستکردنەوەی پەسەندکرانی ئەو پڕۆژەیە لە هەیئەتی دەوڵەتو ئەوەی کە پڕۆژەکە ٣٠٠٠ میلیارد تمەنی تێدەچێ؛ گوتی ئەو پڕۆژەیە تەنیا لە ئەگەری هاتنە پێشێی کەرتی تایبەت جێبەجێ دەکرێ، چونکی دەوڵەت بۆ خۆی توانای ئەوەی نییە.
نیککردار بەڵام گوتی کە تا ئێستا هیچ سەرمایەدانەرێکی بەشی کەرتی تایبەتیش خۆی لەو پڕۆژەیە نەداوە.
جێگری بەشی ئاوەدانکردنەوەی پارێزگاری کرماشان دەڵێ درێژایی ئەو ئوتوبانە ٣٦٠ کیلومیترەو هەر کیلومیتر لەو ئوتوبانە ٧ میلیارد تمەنی دەوێو سەرجەم پڕۆژەکە زیاتر لە ٣٠٠٠ میلیارد تمەنی تێدەچێ.
ناوبراو دەڵێ کە چەند کەسێک ئامادەیی خۆیان بۆ سەرمایەدانان لە سەر ئەو پڕۆژەیە دەربڕیوە، بەڵام تا ئێستا هەمووی هەر لە ئاستی قسەدا بووەو کەس بە جیددیو شێلگیرانە نەهاتۆتە پێشێ.
شایانی باسە کە دەوڵەتی ڕوحانی تا ئێستا چەند جار گوتویەتی کە لە ئەگەری بەردەوامیی ڕەوتی دابەزینی نرخی نەوتو لە كاتی مانەوەی ئەم نرخە لە ئاستی ٣٠ دۆلاردا، دەوڵەت تەنیا توانای دابینكردنی مووچەی كارمەندەکانی دەبێو ناتوانێ هیچ بوودجەیەك بۆ كاروباری ئاوەدان كردنەوەو خزمەتگوزارییە كۆمەڵایەتییەكان لەبەرچاو بگرێ.
