خاتوون شاهیدی، هاوسەری کۆچکردوو برایم نەخشین، خەڵکی ناوچەی شنۆ، لە نێوەراستی مانگی بەفرانباردا کۆچی دوایی کرد.
دایە خاتوون، ژنێکی دڵسۆزو نیشتمانپەروەر بوو کە هاوکارو جێی متمانەی تەشکیلاتی نێوخۆی حیزبی دیموکراتو تێکۆشەرانی دیموکرات لە ناوچەی شنۆ بوو. مێردەکەشی کاک برایم نەخشین کە چەند ساڵ لەمەوبەر کۆچی دوایی کرد، هەمیشە پشتیوانو هاندەری ئەو خانمە بوو بۆ تێکۆشانو خزمەتی دڵسۆزانە. ئەو ژنو مێردە نیشتمانپەروەرو وڵاتپارێزە، پشتو پەنایەکی جێگای متمانە بوون بۆ شەهید عومەر شەریفیان، تێکۆشەری چالاکی تەشکیلاتی نهێنیی حیزب لە ناوچەی شنۆ، کە ڕێژیم دواتر خستیە زیندانو ئێعدامی کرد.
کۆمیسیۆنی تەشکیلاتی حیزبی دیموکراتی کوردستان، بەبۆنەی کۆچی دوایی دایە خاتوون، سەرەخۆشی لە بنەماڵە بەڕیزەکەی، هەموو کەسوکاریانو خەڵکی دڵسۆزی ناوچەی شنۆ دەکاو خۆی بە هاوبەشی خەمیان دەزانێ. یادی ئەو ژنە نیشتمانپەروەرە لای تێکۆشەران و ئەندامانی حیزبی دیموکرات لە ناوچەی شنۆ هەمیشە بەڕێزو بە بەرزی دەمێنێتەوە.