باسێک لە شەرەفنامەی کورد لە کۆبوونەوەیەک لە کافە کتێبی کاڵ

کۆڕێک بۆ باسکردن‌و دەرخستنی هەندێ لایەنی شەڕەفنامە بە ناوی” پێگەی ئەدەبیی شەرەفنامەو مێژوو نووسیی کورد” لە کافە کتێبی کاڵ بەرێوە چوو.
لەم کۆڕەدا کە ڕۆژی چوارشەممە، ١٦ ی بەفرانبار گیرا، “ماجد مەردوخ ڕۆحانی” و “حامید فەرزای” بەشداری باسەکان بوون‌و لەسەر ئەو بابەتە بۆ بەشداران دوان.
لە کۆرەدا ماجد مەردووخ ڕۆحانی، فەرهەنگ نووس‌و مێژووناسی کورد، باسێکی لەسەر گرنگیی نووسینەوەی مێژوو لەلایەن شەرەفخانی بدلیسی‌و پێگەی خودی شەرەفخان کرد. ئەو هەروەها باسی لە بارودۆخی ژیان‌و سەردەمی ئەو کەسایەتییەو هەندێ لە لەمپەر و دژواری‌یەکانی ئەم ئەرکە گرنگە کردو لە درێژەی باسەکەی‌دا پەرژایە سەر چۆنیەتی وەرگێڕانی ئەم دەقە مێژووییە لەلایەن مامۆستا هەژارەوە.
ماجد مەردووخ ڕۆحانی ئاوڕی لە لایەنی فۆرمی‌و نێوەرۆکی شەرەفنامەو وەرگێڕانەکەی مامۆستا هەژار دایەوەو هەروەها ئاماژەی بە ئەو سەرمایە زمانی‌یە دا کە هەژار موکریانی لە ناو شەڕەفنامەدا بەرهەمی هێناوە.
لە درێژەی کۆڕەکەداو لە بەشێکی دیکەی ئەم دانیشتنەدا، حامید فەرازی؛ کارناسی باڵای مێژوو و توێژەری فەرهەنگی باسێکی چڕوپڕی سەبارەت بە سەرچاوە بوونی شەڕەفنامە لە نێو ڕەوتی ڕۆشنبیری‌و مێژوونووسیی کورد کرد و بە شێوازێکی زانستی باسی لە ڕوانگە جیاوازەکانی مێژوو نووسی کردو پێگەی شەرەفنامەی لە مێژوونووسی کوری‌دا خستە ڕوو.
فەرازی وێڕای باس کردن لە گرنگیی ئەوەی کورد پێویستە خۆی مێژووی خۆی بنووسێتەوە، باسی غیابی دەقی جێ متمانەی مێژوویی بە زمانی کوردی کرد، ئەو جۆرە دەقانەی کە وەک شەرەفنامە بتوانن تەعبیر لە بارودۆخ و سەردەمە جیاوازەکان بکەن‌و، ئاماژەی بە بیری نەتەوایەتی مامۆستا هەژاریش کرد بۆ تەرجەمەی ئەم دەقە گرنگە.
لە بڕگەی کۆتاییدا ئامادەبووان کۆمەڵێک پرسیاریان ئاراستەی بەڕێزان ماجد مەردووخ ڕۆحانی‌و حامید فەرازی کرد کە بە وردی لە لایەن ئەوانەوە وڵام درایەوە.