كاربەدەستانی پارێزگای كرماشان دەڵێن لە ساڵی داهاتووشدا فیکەی قەتار ناگاتە كرماشان.
موجتەبا نیك كردار، جێگری كاروباری ئاوەدانكردنەوەی پارێزگای كرماشان گوتی: بەم ڕەوتەی كە ئێستا لە بواری تەرخانكرانی بوودجەوە گرتوویانەتە بەر، هیچ دوورەدیمەنێكی باش لە بابەت گەیشتنی قەتار لە ساڵی داهاتوودا بۆ كرماشان بەدی ناكرێ.
ناوبراو وەبیری هێنایەوە، بەهۆی نەگەیشتنی بووجەی پێویست بۆ ئەم پرۆژەیە، خاوەنكار بە كردەوە توانای بەرەوپێش بردنی ئەم پرۆژەی نەمابوو، هەر بۆیە وەزیری ڕێگەوبانو شارسازی بەڵێنیی ئەوەی دا كە بەشێك لە داواكانی ئەم خاوەنكارە وە ئەستۆ بگرێ تا بتوانێ درێژە بە پرۆژەكەی بدا.
نیك كردار وێڕای ئاماژە بەم بابەتە كە بەم بارودۆخەی ئێستا كە لەگەڵ كەمیی بوودجە بەرەوڕوون، هیچ دوورەدیمەنێكی باش بۆ تەواوبوونی ئەم پرۆژەیە بەدی ناكرێ، گوتی: لە ئەگەری ئەوەدا کە بوودجەی ١٦٨ میلیارد تمەنیی ئەمساڵ بە تەواوی بۆ ئەو پرۆژەیە تەرخان بكرێو لە ساڵی داهاتووشدا بڕی٢٥٠ تا ٣٠٠ میلیارد تمەنی دیكەی پێ بدەن، ڕەنگبێ لە ساڵی داهاتوودا ئەو پڕۆژەیە تەواو بێ، دەنا دیسانەکەش وەدوا دەکەوێ.
جێگری كاروباری ئاوەدانكردنەوەی پارێزگای كرماشان لە حاڵێكدا تەواوبونی ئەم پرۆژەی لە ساڵی داهاتوودا بە دابینكرانی ئەم بڕە بوودجەیە بەستەوە، كە ئەمساڵ تەنانەت ئەو بوودجەی ١٦٨ میلیارد تمەنییەش کە بۆ ئەم پرۆژەیە تەرخان کرابوو، دابین نەکرا