ئاماری تووشبووان بە مادەی هۆشبەر لە پارێزگای ورمێ بە ڕێژەیەكی بەرچاو ڕوو لە زیاد بوونە.
هووشەنگ عەتاپوور، بەڕێوەبەری گشتیی كاروباری فەرهەنگیو كۆمەڵایەتیی پارێزگای ورمێ دهڵێ لە ئێستادا زیاتر لە ٢ میلیۆنو ٥٠٠ هەزار كەس لە ئێران موعتادن، لەم بەینەدا پشكی پارێزگای ورمێ بە ٣ میلیۆن حەشیمەتەوە ٧٥ هەزار كەسە.
ناوبراو هەروەها گوتویەتی: زیاتر لە سەدی ٤٤ی زیندانییان لە پارێزگای ورمێ به تاوانی پێوهندیدار به ماددهی هۆشبهر گیراونو سەدی ٢٤ی دیكەشیان لەسەر دزیو چەتەیی بهند كراون.
ناوبراو وێڕای ئاماژە بەم بابەتە كە ئهم پارێزگایه پتر لە ٣٥ هەزار ژنی سەرپەرستی خێزانو ١٠ هەزار زیندانیی هەیە، ڕایگەیاند كە ئەمانه تهنیا بهشێک له خهساره کۆمهڵایهتییهکان له پارێزگای ئیلامن که مهترسیی تهشهنهکردنی زیاتریان لێدهکرێ.
ئەم كاربەدەستەی پارێزگاریی ورمێ لە درێژەی قسەكانیدا گوتی هەموو ساڵێ پەروەندەكانی سەرپێچیو لادانەكان لە پارێزگای ورمێ تا ئاستی سەدی ٢٠ زیاد دەبن.
بە قسەی عەتاپوور، داهاتی دەوڵەت لە ساڵی ٩١ زیاتر لە ١٢٠ میلیارد دۆلار بووه كە ئێستا بۆ نزیكەی ١٨ میلیارد دۆلار دابەزیوەو، بەم داهاتەش بەڕێوەبەردنی كاروباری كۆمەڵایەتیو پشتیوانی كردن له خهڵکی ئاتاج زۆر سەختو دژوار بووە.
بەڕێوەبەری گشتیی كاروباری فەرهەنگیو كۆمەڵایەتیی پارێزگای ورمێ لە بابەت بڕيی ئەم یارمهتییهی لە ساڵی ٧٨ بەم لاوە، بە كەسانی سەر بە ڕێكخراوی بێهزیستی دەدرێ، گوتی: ئهوه زیاتر له ١٦ ساڵه که بێهزیستی هەر ٥٠ هەزار تمەن یارمهتی بە كەمئەندامان دەداو ئهو بڕه یارمهتییه نهگۆڕ ماوهتهوه. ئهو دهڵێ پێویستە دان بەوە دابنێین كە ئێران لەچاو وڵاتانی دیكە لە بواری پێدانی هەقدەستو مووچەی كەرتە دەوڵەتی و تایبەتییەكان سەدی ٤٠٠ لە دواوەیە.
عەتاپوور هەروەها گوتی که لە ئەگەری بەردەوامیی ڕەوتی دابەزینی نرخی نەوتو لە كاتی مانەوەی ئەم نرخە لە ئاستی ٣٠ دۆلاردا، دەوڵەت تەنیا توانای دابینكردنی مووچەی كارمەندەکانی دەبێو ناتوانێ هیچ بوودجەیەك بۆ كاروباری ئاوەدان كردنەوەو خزمەتگوزارییە كۆمەڵایەتییەكان لەبەرچاو بگرێ.