ڕۆڵە بەجەرگ و ئازا و دڵسۆزەکانی گوندی نییەری سەربەرز و خوێناوی جارێکی دیکە و بۆ یادکردنەوەی ٢ی ڕێبەندانی پیرۆز، نموونەیەکی جوانی چالاکییان نواند.
بە پێی هەواڵی گەیشتوو لە کۆمیسیۆنی تەشکیلاتی حیزبی دێموکراتی کوردستانەوە، ڕۆژی ٢ی رێبەندانی ٩٩ی هەتاوی، حەفتاوپێنجەمین ساڵیادی کۆمارە مەزنەکەی کوردستان، ڕۆڵە بوێر و چاو نەترسەکانی نییەری هەمیشە دێموکرات،مەکۆی شەهیدان، سومبولی ئازایەتی و کۆڵنەدەریی، سەرەڕای کەشیکی تەواو میلیتاریزەکراوی کوردستان، بە شیوەیەکی جوان و ڕێک و پیک و بەرنامە بۆ داڕیژراو، بە بەرزکردنەوەی ئاڵای پیرۆزی کوردستان و پۆل پۆل وەستان و ڕێزگرتن لەو ئاڵایە و خوێندنی سروودی نەتەوایەتیی ئەی ڕەقیب، بڵاو کردنەوەی نوقڵ و شیرینی و نووسینی دروشمی تایبەت بەو ڕۆژە نەتەوەییە نموونەیەک لە خەبات و خۆڕاگریی نەتەوەیەکیان بە دۆست و دوژمن نیشان دا و سەلماندیان کە دەیانساڵ زەبر و زەنگ وسەرکوت و شەهیدکردنی ڕۆڵەکانمان، نەک هەر نامانترسێنێ و تۆزقاڵێک لە ئامانجەکانمان دوورمان ناخاتەوە، بەڵکوو شێلگیرترمان دەکا لەسەر گەیشتن بەو ئاوات و ئامانجانەی کە ٧٥ساڵە خوێنی بۆ دەبەخشین و خەباتی بۆ دەکەین.
لە لایەن کۆمیسیۆنی تەشکیلاتی حیزبی دێموکراتی کوردستانەوە پڕ بە دڵ دەسخۆشی و ماندوونەبوونی لەوهاوڕێیانەمان لە گوندی سەربەرز و شەهیدپەروەری دێموکراتدۆستی نییەری قارەمان دەکەین و دەستی ماندووبوونیان دەگوشین و هیوای سەرکەوتنی زیاتریان لە ئەرک و چالاکییەکانیاندا بۆ بە ئاوات دەخوازین.