لە ماوەی چەند ڕۆژی ڕابردوودا ٦ حاڵەتی مانگرتنو ناڕەزایەتی دەربڕینی چینو توێژەكانی شاری كرماشان بەردەوام بووە.
بەپێی هەواڵی گەیشتوو بە كوردستان و كورد، كۆمەڵێك لە ئەندامانی ئیدارەی سەبتو ئەحواڵ بەهۆی پێنەدانی مووچەی مانگی سەرماەزیان لە بەردەم ئەم ئیدارەیە لە شەقامی بەهێشتی كۆبوونەوەو داوای مووچەی دواكەوتووی خۆیان كرد.
گرووپێك لە خوێندكارانی زانكۆی “سەما”ش بە هۆی پێنەدانی كارتی بەشداریكردنی تاقیكرنەوەكانیان بە بیانووی قەرزداربوونیان بە زانكۆ لە شوێنی كاروباری فێركردنی ئەم زانكۆیە لە شەقامی ڕەسالەت كۆبوونەوەو بە توندی ناڕەزایەتیی خۆیان بەو بڕیارە دەربڕی.
ڕۆژی شەممە 12ی بەفرانباریش گرووپێك لە خوێندكارانی زانكۆی پەیام نووری كرماشان بە بیانووی پێنەدانی قەرزەكانیان بە زانكۆ، ئیزنیان پێ نەدان بەشداری لە تاقیكردنەوەكاندا بكەن لە شوێنی زانكۆ كۆبوونەوەی ناڕەزایەتییان دەربڕی.
كۆمەڵێكی دیكە لە كارمەندانی دابینكردنی كۆمەڵایەتیی لقی ژمارەی 3ی كرماشانیش بەهۆی پێنەدانی زیادەكاریی ٤ مانگیان لە بەدەم ئەم ئیدارەیە لە شەقامی “بێنتولهودا” كۆبوونەوە.
لەلایەکی دیکەوە گرووپێكی دیكە لە كارمەندانی ئیدارەی ئاوی كرماشان بە هۆی وەرنەگرتنی مووچەی ٢ مانگی ڕابردوو لە بەردەم ئیدارەی ئاو لە شەقامی “ئیمام” كۆبوونەوەو داوای مووچەو حەقدەستەکانیان کرد.
هەروەها ڕۆژی 12ی بەفرانبار، گرووپێك لە كرێكارانی شیركەتی ئامونیاك بە هۆی وەرنەگرتنی مووچەی زیادەكاریی ٢ مانگی ڕابردوو لە شوێنی ئەم شیركەتە هەڵكەوتوو لە شەقامی كرماشان ـ بێستون كۆبوونەوە.
