دابین نەبوونی بوودجەی لافاوەکەی ئیلام

لە حاڵێكدا ماوەی زیاتر لە ٢ مانگ لە لافاوەکەیی پارێزگای ئیلام تێدەپەڕێ‌و دوای ئەوەی کە ئەو لافاوە خەسارو زیانێكی گەورەی لە بەشەكانی شار، ماڵی خەڵك‌و كەرتەكانی جووتیاری دا، بەڵام ئەم بوودجەیەی لەلایەن هەیئەتی دەوڵەتەوە بۆ قەرەبووكردنەوەی لەبەر چاو گیرابوو، هیشتا نەدراوەتە ئیلام.
ڕۆژی پێنجشەممە 7ی خەزەڵوەر بە هۆی بارینی٣٤٥ میلیمیتر باران سیڵاوێکی بەخوڕ لە شاری ئیلام وەڕێكەوت‌و خەسارەت‌و زیانێكی زۆری لە ماڵی خەڵك، ئیدارە دەوڵەتی‌یەکان، ڕێگەوبان، كەرتی جووتیاری داو؛ ئەمەش بووەی هۆی ئەو كە ئەم پارێزگا دواکەوتوو لە گەشەو ئاوەدانی ئەوەی هەشی بوو لە کیسی چوو.
پاش لافاوەكەی ئەم پارێزگایە، كاربەدەستان وكارناسان ڕایانگەیاند كە ئاستی زیان‌و وێرانی‌یەکانی لافاوەکە لە بەشی گشتی‌و ئیداری‌و ماڵان ئەوەندە قورس بووە كە بۆ نۆژەنكردنەوەی چەندین ساڵ زەمەن دەبا.
پاش هەڵسەنگاندنەكانی كارناسان لەلایەن بەرپرسانی ئێران‌و پارێزگا، محەممەد مروارید پارێزگاری ئیلام ڕایگەیاند كە زیانی لافاوەکە ١٥٠٠ میلیارد تمەن بووەو دەوڵەت لەوەندە زیانە تەرخانكردنی ١٥٣ میلیارد تمەنی وەک قەرەبووی ئەو زیانە پەسند کرد، کەچی دوای نزیك بە ٢ مانگ لەم بڕیارە ئەوەندە بودجەو قەرەبوویەش بە ئیلام‌و خەڵکەکە نەدراوە.