شاری داڵاهۆ سەر بە پارێزگای کرماشان، وەک شاری نەتەوەیی تەموورە لە ڕیکخراوی یۆنێسکۆدا تۆماری جیهانیی کرا.
ڕۆژی دووشەممە ٢٢ی بەفرانبار، شاری داڵاهۆ وەک شاری نەتەوەیی تەموورە کە دانیشتووانی ئەو شارە هۆگرییەکی تایبەتیان بەو سازە هەیە و لە بەڵگە مێژووییەکانیشدا داڵاهۆ وەکوو نیشتمانی تەموورە ناسراوە لە لایەن یۆنێسکۆوە تۆماری جیهانی کرا.
تەموورە سازی ئایینی پەیڕەوانی ئایینی یارسانە و لە ڕیوڕەسم و بۆنە ئایینییەکاندا کەڵکی لێوەردەگیرێ و تێکەڵی نزا و دوعا، شایی و پرسە وخەم و تەنیاییە.
لە شاری داڵاهۆ ٢٨٨ کارگەی بەرهەمهێنانی تەموورە هەیە و زیاتر لە ١٢ هەزار کەس لەو کارگەیانە سەرقالی دروستکردنی ئەو سازەن.
تەموورە مێژووی ٦٠٠٠ هەزار ساڵەی هەیە و بەشێکی دانەبڕاوە لە رێوڕەسمە شاد و ماتەمینییەکانی خەڵکی کورد و بە تایبەت هۆگران و ئەویندارانی ئایینی یارسان.
