هونەرمەندێکی کورد لەلایەن هێزەکانی ئیتلاعاتی کۆماری ئیسلامیی ئێران، لە کرماشان دەسبەسەر کرا و چارەنووسی نادیارە.
ڕۆژی دووشەممە ١٥ی بەفرانباری ٩٩ی هەتاوی، هێزەکانی سازمانی ئیتلاعاتی سپای پاسداران لە کرماشان هونەرمەندێکی کورد بە ناوی “ئیحسان ئیوەتوەندی”یان دەسبەسەر کردووە و ناوبراو بۆ شوێنێکی نادیار گوازراوەتەوە.
بە وتەی سەرچاوەیەکی ئاگادار لەو بارەوە، دوای دەسبەسەر کردنی ئەو هونەرمەندە کوردە، کاناڵی ئینستاگرام و تلگرامیی ناوبراو بە ناوی “کورد میوزیک” بە بڕیاری دەزگای قەزایی داخران.
شایانی باسە کە “ئیحسان ئیوەتوەندی” لە هونەرمەندانی لاوی کرماشانە و تا ئێستا چەندین ئاوازی بە زاراوەی لەکی بڵاو کردووەتەوە.
تا کاتی ئامادە کردنی ئەم هەواڵە، لە هۆکاری دەسبەسەر کردن و شوێنی ڕاگرتنی ناوبراو هیچ زانیارییەک لە بەردەستدا نییە.
