مستەفا کازمی: ئیزن نادەین بەکارهێنانی چەکوچۆڵی نایاسایی ببێتە هۆکاری ناسەقامگیری لە عێراقدا.
مستەفا کازمی سەرۆک وەزیرانی عێراق ڕۆژی دووشەممە ٨ی بەفرانباری ٩٩ی هەتاوی لە وتوویژێکدا دەڵێ: ئیزن نادەم کە کەس یان گرووپێک بە بەکارهێنانی چەکوچۆڵی نایاسایی، هەڕەشە بکەنە سەر ئازادی، ئاسایش و بڕواکانی هاوڵاتییانی عێراقی.
کازمی بەجەختکردنەوە لە سەر ئەوەیکە ناوبراو سەرۆک وەزیرانێکی سەربەخۆییە و سەر بە هیچ باڵێکی سیاسیی نییە وتی: عێراق لە نێوان دوو بەرەدا دابەش بووە و ئەمەش هۆکارێکە بۆ دابەشبوونی دەسەڵاتەکان و ناسەقامگیریی لەم وڵاتەدا، ئێمە دەتوانین بە یاسای پەسەند کراوی عێراق سەرکەوتن وسەروەری بۆ هاووڵاتییانمان و خاکی عێراق دەستەبەر بکەین.
بەپێی ڕاپۆرتی هەواڵدەرییەکانی عێراق سەرۆک وەزیرانی ئەو وڵاتە وتی: کاری سەرەکیی من وەکوو سەرۆک وەزیران پاراستنی یەکیەتی و یەکڕیزیی خاکی عێراقە و ئیزن بە هیچ کەس و گرووپێک نادەین کە سەروەریی خاکی عێراق بباتە ژێر پرسیار.
پێشتر لە کاردانەوە بە هەڕەشەکردن لە سەرۆک وەزیرانی عێراق لە لایەن میلیشیاکانی سەر بە ڕێژیمی ئێرانەوە، ئەرتەشی عێراق ڕۆژی یەکشەممە لە بەیاننامەیەکدا ڕایگەیاند کە ١میلیۆن و ٨٠٠هەزار هێزی سەربازیی ئامادەی جێبەجیکردنی فەرمانی سەرۆک وەزیران و بە گژداچوونەوەی میلیشیاکانی سەر بە ڕێژیمی ئیرانن.
جێگای ئاماژەیە بەپێی ڕاپۆرتی ئەلعەرەبییە، بڕیاری دەسبەسەرکرانی”ئەبوعەلی عەسکەری” یەکێک لە ڕێبەرانی میلیشیاکانی حیزبوڵای عێراق، لە لایەن سەرۆک وەزیرانی عێراقەوە بووە.
