بەبەشداری هونەرمەندان و حەیرانبێژانی ڕۆژهەڵاتی کوردستان، فێستیڤاڵی بەیت و حەیران لە شاری ڕانیە بەرێوە چوو.
ڕۆژی پێنجشەممە ٤بەفرانباری ۹۹ی هەتاوی لەلایەن بەڕێوەبەرایەتیی بنکەی ڕۆشنبیری و هونەریی ڕانیە، بەبەشداری هونەرمەندان و حەیرانبێژانی ڕۆژهەڵاتی کوردستان یەکەمین ڤێستیڤاڵی “دیداری بەیت و حەیران”، لە شاری ڕانیەی باشووری کوردستان بەڕێوەچوو.
لەسەرەتای فێستیڤاڵەکەدا و پاش ساتێک بێدەنگی بۆ ڕێزگرتن لە خەبات و گیانی پاکی شەهیدانی کوردستان، لەلایەن بەڕێزعوسمان ڕەسووڵ بەڕێوەبەری فێستیڤاڵی “دیداری بەیت و حەیران”، دوای پێشەکییەک و ناساندنی فێستیڤاڵاکە، چەند وتەیەکی لە سەر مێژووی پێوەندی هونەریی و کلتووریی هونەرمەندانی ڕۆژهەڵات و باشووری کوردستان پێشکەش بە ئامادەبوان کرد.
دواتر مامۆستا خدر قادری ناسراو بە “خلە دەرزی”، حەیرانبێژی ناسراوی کورد، ، خەڵکی شاری سەردەشتی ڕۆژهەڵاتی کوردستان بە حەیرانێک فێستیڤاڵەکەی ڕازاندەوە و دوای پێشکەشکردنی حەیرانەکەی سپاسی بەڕێوەبەرانی ئەو فێستیڤاڵەی کرد و هیوای خواست ئەم کلتوورە بە هاوبەشی خەڵکی باشوور و ڕۆژهەڵاتی کوردستان لە پەرە سەندندابێت بۆ ئەوەی نەوەکانی دوای خۆیان مێژووی هونەری نەتەوەکەیان بە جوانی بناسن و لە بیری نەکەن.
لە بڕگەیەکی دیکەی دیداری بەیت و حەیراندا، قاییمقامی شاری ڕانیە وتارێکی لەو بارەوە پێشکەش کرد و بەجەختکردنەوە لەسەر ئەوەیکە ئەمە یەکەم دیداری بەیت و حەیرانە لە شاری ڕانیە، بەشداریی هونەرمەندان و حەیرانبێژانی ناسراوی ڕۆژهەڵاتی کوردستانی بەرز نرخاند و هیوای خواست کە لە داهاتوودا ئەم فێستیڤاڵانە زیاتر پەرە بستێنێ و فەرهەنگ و هونەری کوردی لە سەر دەستی ئەو هونەرمەندانە هەروا بە زیندووی بمێنێتەوە.
لە درێژەی ڤێستیڤاڵی “دیداری بەیت و حەیران” سەلاح خزری هونەرمەندی ناسراوی ڕۆژهەڵاتی کوردستان، چەند وتەیەکی لەسەر بەیت و حەیران، لاوک، هەڵبەست و هونەری کوردیی پێشکەش بە ئامادەبوان کرد، هونەرمەند سەلاح خزری تیشکی خستە سەر مێژووی بەیت و حەیرانی کردستان بە گشتی و باشوور و ڕۆژهەڵاتی کوردستان بە تایبەتی و گوتی؛ هونەرمەندانی ئەم دوو بەشەی کوردستان زیاتر لە بەشەکانی دیکەی کوردستان فەرهەنگ و هونەریان هاوبەشە، بۆیە بە درێژایی مێژوو ئەو دوو بەشەی نیشتمان زیاتر توانیویانە پێکەوە هونەری کوردی بە گشتی و بەیت و حەیران بە تایبەتی بپارێزن و بە هاوبەشی هەوڵ بدەن بۆ زیاتر دەوڵەمەند کردنی کلتووری کوردی لەو بوارەدا.
هەروەها لە بڕگەیەکی دیکەدا، ئەحمەد حەیران هونەرمەندی ناسراوی ڕۆژهەڵاتی کوردستان مەقام و حەیرانێکی پێشکەش بە میوانانی فێستیڤاڵەکە کرد. هەرلەو دیدارەداچەند هونەرمەنێکی دیکەی باشووری کوردستان، هونەرمەند فەتاح سەوزەواری، خاڵە دێهاتی، کارۆخ وەرتی و چەند هونەرمەندێکی دیکەی بەشداربوو، “یەکەم دیداری بەیت و حەیران”یان زیاتر ڕازاندەوە.
شایانی باسەکە، لە کۆتایی یەکەم دیداری بەیت و حەیران، کتێبی هونەرمەندی کۆچکردوو مامۆستا “زیاد حەمەدەمین” هونەرمەندی ناوداری باشووری کوردستان، وەکوو خەڵات پێشکەش بە هونەرمەندان و حەیرانبێژانی بەشداربوو کرا.