شەوی تاریكە دەبێ لەو كەلە دەنگ هەڵبێنم
مانگ و ئەستێرە بە هاوارێ لە خەو هەستێنم
لە شەوێكا كە لە گشت لایە شەپۆڕی شین بوو
دوژمنم ڕەشبەڵەكی بوو لە دەمی بەستێنم
تەرمی خوێناویی شەهید هێشتە لە مەیدانێ بوو
نەگبەت و چارەڕەشی گرتبوویان داوێنم
هەر چیابوو لە تەمی گرتبوو لووتكە و، پێدەشت
شینی پۆشیبوو ئیتر كەس نەبوو تا بیدوێنم
كورد لە شیندا بوو كە سوارچاكی لە خوێن گەوزیبوو
كەوتبوو تەرمی سەدان سواری پڵینگ تارێنم
شینی سمكۆ بوو لەو ئەولاشەوە شایی دوژمن
مەرگی هیوا بوو لە كوێستان و بەری گەرمێنم
ئەو شەوە دایكی فەلەك چەرخ و خولێكی لێ دا
هاتە فریای گەل و هاواری چیا تاوێنم
هات و دیاریی بە گەلم بەخشی ئەویش بیرمەندێ
كە چیا ئێژێ دەبێ سەرمی لەبەر دانوێنم
من لە سای هزری ئەوا پێگەیوم، دەتوانم
نائومێدی و مەرگ بەو هزرە بەچۆك دابێنم
كۆشكی زۆرداری ئەگەر بەردی بناغەی زوڵمە
فێری كردم بە قەڵەم لێی دەم و بیڕووخێنم
پێی وتم چەشنی شەپۆل بێت و بوەستم دەمرم
دەبێ ڕابم بە خەبات تۆوی هومێد داچێنم
فێری كردم كە هەڵۆی شاخ بم و بۆ باخی گەل
بولبولێك بم كە بە گیان بۆ گەلی خۆم بخوێنم
هات و مانایەكی نوێی دا بە خەبات و فێر بووم
واز لە نامۆیی و بێگانە پەرستی بێنم
كێ لە شەوگاری ڕەشا خۆری لە كەل دی هەڵبێ
جیا لە كورد كێ هەیە ئەو موژدە گەشەی بۆ بێنم
دوژمنم بەردی لە ئاوێنە دەدا نەیبینێ
ئەو كە تینوو بوو بە گیاندان و دڵۆپی خوێنم
نەیدەزانی كە لە ئاوێنە شكاودا ئەوجار
نەوەك هەر جارێ لە سەد گۆشەوە خۆ دەنوێنم
