سینگی شەقارشەقاری عەرد
دەلاڵێ بۆ نمەی باران
لە باڵای لەباری هێرۆ
دەهاڵێ هوڕ؛ هوڕی ئاران
ئاسمان تەم و هەوا تۆز و
گێژەڵووکەش تەنوورەی دێو
دار و چێو تینوونە، وشکن
لقی گوڵ و گەڵاش دزێو
بولبول ونە، قەل دەقرێ
داڵ و کەرگەز دەخولێنەوە
چیا ڕووتەن، ڕەوەز وەڕەز
کۆچ‌ماڵە و دڵ دەکولێنەوە
ژەرەژ قاسپەی لێ بڕاوە
سەقڕ وڕە، پەرکوور دینە
شریخەی کاتیۆشا و گرمەی
تۆپ و تەقینەوەی مینە
کۆتر مات و لانەوازن
ڕێوی سازن، قومری قڕن
مامز تەرە، چەقەڵ غولوور
دنیا لێڵە و دڵیش پڕن
کانی کۆرن، کێڵگە ڕەقن
مرۆڤ کوێڵەی درۆ و گزنی
سوژدە دەبا بۆ دەرگانەی
گەڵی، ورگی، مەڕی، بزنی
قەڵا بەندە و شار خامۆشە
سڕن، مڕ و نەزان کە چن
ڕەوە ئاسکێک نادەستەمۆ
بە پێدزە بۆی دەردەچن
ئەنگۆرەیە: مەستین، تاساو
گەشکەین بە بۆنی گڵ و گیا
بەردەم دەشتە تا چاو بڕکا
پاڵپشتمان دوندی چیا
لەبەرقەدی “ڕەندۆڵە”دا
ترووسکەی ئاگرێ دەگڕێ
شنەی گێوژ و داربەڕوو
دڵی بێدەنگی شەو دەبڕێ
لەنێو کۆڕی حەپەساودا
فڕی دەنگی “ب..بابە..با..ب بە”
خنکا دەنگی “حەمە”ی دیسان
بەچاو دەیگوت هەستە، ڕا بە
بە دڵی شکاو، چاو نەترساو
سرک و بەتاو، هەستا سەر پێ
دەستێ بەڕێز لەسەر سینگ و
دەستەکەی‌تر مستی گرێ
دەیگوڕڕاند پڕ بە گەروو
کەچی نەگوێ نە زمانی بوو
کوتکی تانەی دا لە کەللەن
بەزمی لەبۆ خزمانی بوو!
دڵ دارماڵ لە تاسە و هومێد،
هەست، هەستی ئینسانی و نەجیب
بەسۆزەوە دەیخوێندەوە
بۆ گەل سروودی “ئەی رەقیب”!
کپ بوو گەرووی، چاویش پڕ ئاو
غڵدە غڵدی هۆش داگرە
کەبوونە یەک کینە و ئەوین
بە سووتمانە ئەو ئاگرە
من بیلبیلان ئەو لاڵ و کەڕ
جومگەی دەستانی وا گرتم
تەزوو نا، لەرزی شوورەیی
سەراتاپای لەشی داگرتم
شنۆ گەلاوێژی ١٣٨٥
