لە ماوەی ئەم سێ مانگی پاییزی ئەمساڵدا لانی کەم ١٤٣ کەس لە شارە و ناوچە جیاوازەکانی کوردستان لەلایەن دەزگا ئەمنیەتییەکانەوە بە تۆمەتی چالاکیی ئەمنیەتی و سیاسی لەدژی کۆماری ئیسلامی و بەرژەوەندییەکانی ئەو ڕێژیمە گیراون. ژمارەیەک لەوان دوای لێکۆڵینەوە و لێپێچینەوەکانی ناوەندە ئەمنیەتییەکان تا کاتی دادگاییکرانیان بە دانانی بارمتە ئازاد کراون و ٤٢ کەس لەوان حوکمی لە 4 مانگ تا ١٥ ساڵ و سەرجەم 1947 مانگ زیندان (١٦٢ ساڵ و ٣ مانگ) زیندانیان بەسەردا سەپاوە.
بەپێی ڕاپۆرتی چاونیوز گرتنی ١٤٣ کەس و حوکمدانی ٤٢ کەس لەوان لە ماوەی سێ مانگی پاییزی ئەمساڵ لە حاڵێکدایە کە له ماوهی سێ مانگەی هاویندا لانیکهم ١٩٢ کهس و لە وەرزی بەهاریشدا 106 چالاکی سیاسی و مەدەنی لە کوردستان لەلایەن ناوەندە ئەمنیەتییەکانەوە دەسبەسەر کرابوون، بەو پێیە ژمارەی ئەو کەسانەی لە کوردستان لە سەرەتای ئەمساڵەوە بە تۆمەتی چالاکیی ئەمنیەتی لەدژی کۆماری ئیسلامی گیراون، لە 441 کەس تێپەڕیوە. لەو ٤٤١ کەسەی لە سەرەتای ئەمساڵەوە تا کۆتایی پاییز دەسبەسەر کراون، لانیکەم ١٣٤ کەس لەوان دادگایی و حوکمی زیندانیان بەسەردا سەپاوە و ژمارەیەکی زۆرتر لەوەندەش هێشتا لە گرتنگەکانی ئیتلاعاتدا دەسبەسەرن و چارەنووسیان ناڕوونە.
