سپای پاسدارنی ڕێژیمی ئێران بەمەبەستی دەسبەسەرداگرتنی مەڕو ماڵاتی خەڵک لە ناوچەی شنۆ هەڵیانکوتایە سەر گوندی بێمزوورتێ.
بەپێی هەواڵی گەیشتوو بە ناوەندی ڕاگەیاندنی حیزبی دێموکراتی کوردستان، ڕۆژی پێنجشەممە ٢٧ی سەرماوەزی ٩٩ی هەتاوی، کۆمەڵیک لە بەکرێگیراوان و پاسدارەکانی سەر بە سپای پاسدارانی ڕێژیمی ئێران، بە بیانووی قاچاخی مەڕوماڵات و هەناردەکردنی بۆ باشوور هەڵیان کوتایە سەر گوندی “بێمزوورتێ” لە ناوچەی شنۆ و دەیانویست بەم بیانووەوە دەست بەسەر مەڕوماڵاتی خەڵکی ئەو ناوچەیەدا بگرن.
شایانی باسە کە لە ئاکامی ئەم دەستدرێژییە بێ شەرمانەیەی سپای پاسداران بۆ سەر مەڕو ماڵاتی خەڵک، خەڵکی گوندەکە زۆر بوێرانە ڕووبەروویان بوونەتەوە و ئیزنیان نەداوە کە مەڕو ماڵاتەکانیان لە گەڵ خۆیان ببەن بەڵام بەکرێگیراوانی سپای پاسدارن تەقە لە مەڕوماڵاتی خەڵکی دەکەن و بەم هۆیەوە زیاتر لە لە سەد سەر لە مەڕ و ماڵاتی خەڵکی ئەو ناوچەیە گوللـە باران دەکەن.
پێویستە بگوترێ کە سپای پاسدارنی ڕێژیمی ئێران بێ هیچ بەڵگەیەک و بە پاساوی قاچاخی مەڕوماڵات بۆ باشووری کوردستان بەردەوام هێرش دەکاتە سەر ماڵی خەڵک و بەم جۆرە بە دەڕندانەترین شێوە مەڕ و ماڵاتی خەڵکی دەکوژێ، کە ئەم دیاردە ناشیرین و قێزەونە تەنیا و تەنیا لە کوردستان و لە لایەن سپای پاسدارانەوە دژ بە خەڵکی زەحمەتکێش بەڕێوە دەچێ.