مەسیح عەلینژاد ڕۆژنامەنووس و چالاکی مافی مرۆڤ لە نامەیەکدا، بۆ باوکی ڕوحوڵڵا زەم نووسیوویەتی: ” ئەو جلوبەرگەت وەبیرهێنەرەوەی ڕەنج و ناڕاحەتی و خەفەتە، کە حکوومەتێکی مرۆڤکوژ، بە هەمان عەبا و قەبا، بە سەر ئێمەیدا، سەپاندووە”
ئەو ڕۆژنامەنووسە لە درێژەدا، نووسیوویەتی: “کاتێک لە سەر گۆڕی کوڕەکەت گریای، دلم ئاگری گرت، بەڵام ئاخۆ لە تەواوی ئەو ساڵانەدا، بۆ ئەو دایک و باوکانەی کە لە سەر گۆڕی ڕۆڵەکانیان لە سەر و سینگی خۆیان دەدا، تۆ گریاوی؟ یان تەنیا لە کاتی مردنی کوڕەکەی خۆتدا گریاوی؟ کورەکەت بە خۆشەویستیی ڕوحوڵڵا خومەینی، بە ڕۆحیئەڵڵا ناودێر کرد، بەڵام ئەویش بوو بە قوربانیی هەمان ڕوحوڵڵا کە لەمێژ ساڵە بە دانی فتوا، ڕۆژنامەوانەکانیان خنکاندووە و پێنووسەکەیان شەکاندووە و سەری زۆرێک لە نووسەرانیان لە ژێر خاک ڕاکردووە.”
لە بەشێکی دیکەی نامەی ئەو چالاکەی مافی مرۆڤەدا هاتووە: “ئێوە لە نێو هەموو ئەو باوکانەدا کە کۆڕەکەیان لەلایەن کۆماری ئیسلامییەوە لەدار دراون، چەند خۆش شانس بوون کە خزمە هاوبیرەکانتان لە دەزگای دادوەری،هەلی دوایین چاوپێکەوتنی لەگەڵ کورەکەتییان پێداون، دەزانی تەنیا سێ مانگ پێش بوو کە نەوید ئەفکاری بە بێ ئەوەیکە هەلی دوایین چاوپێکەوتنی لەگەڵ باوک و دایکی پێبدرێت، بێبەزیانە لە دار درا.”
مەسیح عەلینژاد هەروەها نووسیووتی: ئاغای زەم، بۆچی بۆ شوێنی دوور بڕۆین، دایە شەریفە دەناسی؟ کوڕەکەی، “ڕامین حوسێنپەناهی” لە سێدارە درا، هەلی دوایین چاوپێکەوتن پێشکەشتان، دایە شەریفە لە گرتە ڤیدیۆییەکدا، چاوی لە من و تۆ کرد و ڕایگەیاند: “تەنانەت گۆڕێک بوونی نییە کە لە سەری بگریم” واتە هەلی گریانیان لە سەر گۆڕی کوڕەکەی هەم لە دایە شەریفە و هەم لە دایکی فەرزاد کەمانگەر و زۆرێک لە دایکانی دیکە ئەستاند، تەنانەت بەوانیان ڕانەگەیاند کە تەرمی کوڕەکانیان لە کوێ ئەسپەردە کراوە.
لە تەواوی ئەو ساڵانەدا، ئێوە لە دەفتەری کارەکەتان خەریکی خزمەت بە سیاسەتی سەرکوتی سیاسییەکان و ئەو حکوومەتە قاتڵە بوون و هەلی چاوپێکەوتنی دەرد و ڕەنجی ئەو دایک و باوکانەتان، بە خۆتان نەدا، بەڵام ئەو دەرد و ڕەنجە بەردەرگای ماڵی ئێوەشی گرتەوە.”
ئەو ڕۆژنامەوان و چالاکە مافی مرۆیییە هەروەها نووسیوویەتی: “ئێستا کە ئەو داخ و دەردەتان ناسیووە، ئەو جلوبەرگە کە بۆ خەڵکی ئێران نیشاندەری دەرد و ڕەنجە لە بەری خۆتان داکەنن، جلوبەرگێگ کە نیشانەی لە داردان، درۆکردن و دزیکردنە لە بەرتان داکەنن، هەڵبەت بە جلوبەرگ نییە، بەڵام لابردنی ئەو جلوبەرگە، دڵ هەڵکەندن لەو ڕێژیم و سیستمە زاڵم و زۆردارە ئاسانتر دەکات، خەڵک ئیتر ئەو حکوومەتەیان ناوێ، خەڵک ئیتر تەنیا ناگریین بەڵکوو ناڕەزایەتی دەردەبرن و مافەکانیشیان دەستێنن.
