گیان لە دەست دانی ٦ ئەندامی بنەماڵەیەک لە بانە بە هۆی ڕووداوی هاتوچۆ

ڕووداوی هاتوچۆ لە جادەی نێوان دیواندەرەو سنە کارەساتی لێ‌کەوتەوە.
بەیانیی ڕۆژی یەکشەممە ٦ی بەفرانبار، لە جادەی نێوان دیواندەرەو سنە لە ناوچەی بان هۆوەتوو، بە هۆی پێکدادانی دوو ئۆتۆمبێل، ٦ کەسی بنەماڵەیەک گیانیان لە دەست‌دا.
بە پێی ڕاپۆرتی پەیامنێری کوردکاناڵ لەو رووداوە دڵتەزێنەدا، بنەماڵەی کاک کەریم خورشیدی، خەڵکی ئاوایی نێزەڕۆ لە ناوچەی ئارمردەی بانە، کە بریتین بوون لە: کەریم خورشیدی گەورەی بنەماڵە، خاتوو خەجیجە هاوسەری، دوو کوڕی بە ناوەکانی عەلی‌و هادی خورشیدی ‌و گوڵزار خێزانی یەکێک لە کورەکانی کە دوو گیان بووە بە منداڵێکی تەمەن ٦ مانگان، لە کاتێکدا بۆ چارەسەری نەخۆشی یەکێک لە ئەندامانی بنەماڵەکەیان لە شاری بانەوە بەرەو کرماشان دەڕۆیشتن، لە ناوچەی هۆوەتوو لەگەڵ ئۆتۆمبێلێکی مینی بووس‌دا خۆیان پێک‌داداوە و هەر لە جێ دا هەموو ئەندامانی ئەو بنەماڵەیە گیانیان لە دەست داوە.
جێگەی ئاماژەیە کە خالە کەریم خورشیدی، برای مام شەریف خورشیدی‌و مامی کاک مستەفا و عومەر خۆڕشیدی، تێکۆشەرانی دێرینی ڕیزەکانی حیزبی دیموکراتی کوردستانە. بنەماڵە خالە کەریم خورشیدی، بنەماڵەیەکی خاوەن هەڵوێست‌و گەلدۆست بوون کە بە درێژایی دەیان ساڵ خەباتی ڕزگاری خوازانەی گەلی کورد‌و حیزبی دیموکراتی کوردستان، پشتگیرو پشتیوانی شۆڕش بوون و هەموو کات درگای ماڵیان بە ڕووی شۆڕشگێڕانی کوردو پێشمەرگەکانی حیزبی دیموکراتی کوردستان دا ئاوەڵا بوو.
پێویست بە گوتنە کە تەرمی هەر ٦ کەسەکە لە گوڕستانی گوندی نێزەڕۆ لە ناو خەم وپەژاری بنەماڵە و کەس خزمان و بە بەشداری ئاپۆڕایەکەی زۆری خەڵک ئێوارەی ڕۆژی یەکشەممە بە خاک سپێردران.
ناوەندی ڕاگەیاندنی حیزبی دیموکراتی کوردستان، بە بۆنەی ئەو ڕووداوە دڵتەزێنە خۆی بە شەریکی خەم و پەژارەی خزم‌و کەس‌و کاریان لە نێوخۆ و دەرەوە وڵات، بە تایبەت بنەماڵەی شۆڕشگێری خۆرشیدی ‌و خەڵکی گوندی نێزەڕۆ دەزانێ.