فاتمە تەمیمی، ڕۆژنامەوان، چالاکی مەدەنی و چالاکی مافی ژنان لە لایەن هێزە ئیتلاعاتییەکانی سپای پاسدارانی ڕێژیمی ئێرانەوە دەسبەسەر کرا.
ڕێکخراوی مافی مرۆڤی ئەهواز”ئەهرۆ” ڕۆژی چوارشەممە ١٩ی سەرماوەزی ٩٩ی هەتاوی، ڕایگەیاند کە هێزە ئیتلاعاتییەکانی سپای پاسدارانی ئەهواز”فاتمە تەمیمی” ڕۆژنامەوان، چالاکی مەدەنی و چالاکی مافی ژنان لە ئەهوازیان دەسبەسەر و بۆ شوێنێکی نادیاریان گواستۆتەوە.
بەپێی ڕاپۆرتی ڕێکخراوی مافی مرۆڤی”ئەهرۆ” فاتمە تەمیمی، وێنەگر، ڕۆژنامەوان، دەرهێنەر و چالاکی فەرهەنگی و چالاکی بواری مافەکانی ژنان کە تا ئێستا چەندین کورتە فیلمی لە سەر کێشە کۆمەڵایەتییەکان وەکوو” هەژاری، ماددەسڕکەرەکان و کێشە کۆمەڵایەتییەکانی خەڵک لە ئەهواز بەرهەمهێناوە بە بێ هەبوونی هیچ بەڵگەیەک لە لایەن هێزەکانی ئیدارەی ئیتلاعاتی ئەهوازەوە دەسبەسەر کراوە.
شایانی باسە کە فاتمە تەمیمی، بەردەوام لە کورتە فیلمەکانیدا هەوڵیداوە کە بارودۆخی خراپی گوزەرانی خەڵکی هەژار و کەم داهاتی خەڵکی ئەهواز پیشان بدا و بەردەوام لە کورتە فیلمەکانیدا، ڕێژیمی سەرەڕۆی ئێرانی بە خوڵقینەری نەهامەتیی و بەدبەختییەکان بۆ سەر خەڵکی بێ تاوان نیشان داوە.
جێگای ئاماژەیە کە ئەم چالاکە ئەهوازییە لە ڕۆماڵکردنی هەواڵە تایبەتەکان کە نیشاندەری زوڵم و ستەمی بەرپرسانی گەندەڵی ڕێژیمی ئێران و بە تایبەتی بەرپرسانی ئەهوازی بەرانبەر بە خەڵکی هەژار و بێدەرەتانی ئەهواز دەورێکی بەرچاوی هەبووە.
