دایە خەدیجە مرادی، هاوژین و هاوڕێی پێشمەرگە وکادری دەیانساڵە و خەباتکاری حیزبی دێموکراتی کوردستان هاوڕێ “حەسەن مروەتی” بە هۆی نەخۆشییەوە ماڵاوایی لە ژیان کرد.
سەرلەبەیانی ڕۆژی چوارشەممە ١٢ی سەرماوەزی ٩٩ی هەتاوی دایە “خەدیجە مرادی” خەڵکی سەقز و هاوژین و هاوڕێ پێشمەرگە و کادری ماندوو نەناسی حیزبی دێموکراتی کوردستان هاوڕێ کاک “حەسەن مروەتی” بە هۆی نەخۆشییە دڵی تامەزرۆی لە لێدان کەوت و ماڵاوایی لە ژیان کرد و لە گۆڕستانی شەهیدانی حیزبی دێموکراتدا بە خاکی پیرۆزی کوردستان سپێردرا.
دایە خەدیجە لە ساڵی ٤٨ی هەتاوییەوە کە بۆتە هاوژینی کاک حەسەنی مروەتی لە گەڵ ڕەنج و ئازارەکانی ڕێگای خەبات و تێکۆشاندا لە گەڵ هاوسەرەکەی بەشداربووە و بۆ چرکە ساتێکیش ماندوویەتی بە ڕۆخسارییەوە دیار نەبوو و بەردەوام پاڵپشت و هاندەری کاک حەسەن و پێشمەرگەکانی حیزب بووە لە کار و تێکۆشانیاندا.
شایانی باسە کە کاک “حەسەن مروەتی” لە ساڵی ٥٨ی هەتاوییەوە چەکی شەرەف و بەرگری لە نیشتمان و نەتەوەکەی کردۆتە شان و وەکوو ڕێبوارێکی ماندوو نەناس و خەباتکارێکی قارەمان و بوێر سەرجەم قۆناغەکانی حیزبایەتی و کوردایەتی بە شانازی و سەرکەوتووییەوە بڕیوە و کەسێکی دیاری ڕیزەکانی حیزبی دێموکراتە.
بە بۆنەی کۆچی دوایی دایە “خەدیجە مرادی”یەوە لە لایەن ناوەندی ڕاگەیاندنی حیزبی دێموکراتی کوردستانەوە وێڕای دەربڕینی خەم و پەژارەی خۆمان بۆ کۆچی دوایی دایە خەدیجە، سەرەخۆشی لە بنەماڵەی بەڕێزیان و بە تایبەت هاوڕێ و هاوسەنگەرمان کاک “حەسەن مروەتی” و خزم و کەسوکاریان دەکەین و خۆمان بە شەریکی خەمیان دەزانین.
