بەرەنگار بوونەوەی چالاکانی ژینگە پارێزی، بە دژی داگیرکاری و فەوتاندنی سرووشتی کوردستان لە لایەن سپای پاسدارانی ڕێژیمی ئێرانەوە لە شاری سنە بە بەڕیوەبردنی هەڵمەتی زاگرۆسانە و چاندنی بەروو لە کێوی کوچکەڕەش”ی ئەو شارە.
ڕۆژی سێشەممە ١١ی سەرماوەزی ٩٩ی هەتاوی، هەڵمەتێکی بەربڵاوی بەڕووچاندن لە ژێر ناوی زاگرۆسانە، بە بەشداری دەیان کەس لە چالاکانی مەدەنی و فەرهەنگی و ژینگەپارێزانی شاری سنە لە کێوی کوچکەڕەش بەڕێوە چوو.
شایانی باسە کە چەند ساڵ پێشتر هێزەکانی سپای پاسدارنی رێژیمی ئێران لە شاری سنە دەیانویست کە کێوی کوچکەڕەش داگیر بکەن و بنکە و پایەگای سپای تێدا دامەزرێنن، بەڵام بە هەوڵی زۆری خەڵکی شاری سنە و چالاکانی ژینگە پارێزی ئیزنیان نەدا بە سپای پاسدارانی رێژیمی ئێران کە دەست بە سەر ئەو کێوە کە ئێستا یەکێک لە شوینە دیار و گەشتیارییە گەورەکانی پارێزگای کوردستان و شاری سنەیە بگرن.
لەم هەڵمەتەدا چالاکانی ژینگەپارێزی بە نیشاندانی بەرەنگار بوونەوەی هێزەکانی ڕێژیمی ئێران و پاراستنی ژینگەی کوردستان بە چاندنی بەڕوو جارێکی دێکە سەلماندیان کە کورد و کوردستان بە گشتی دۆستی ژینگەیە و بۆ پاراستنی ژینگەیەکی تەندروست و سڵامەت بەرەنگاری هەموو هێزیکی سەرکوتکەر دەبنەوە.
جێگای ئاماژەیە کە ئەنجومەنی نۆژین کە ئەنجومەنێکی فەرهەنگی و کۆمەڵایەتییە بۆ یەکەمین جار بەشداری لە هەڵمەتی بەڕوو چاندن لە کێوی کوچکەرەشی شاری سنە کردوو.ە
پێویستە بگوترێ کە لە درێژەی چالاکییە ژینگە پارێزییەکانی هەموو پارێزگاکانی کوردستان، ئەنجومەنە ژینگەپارێزەکان چالاکانی مەدەنی بەردەوام و ساڵانە لە ژێر ناوی هەڵمەتی زاگرۆسانەدا ڕوو لە شاخ و کێوەکانی هەموو ناوچەکانی کوردستان دەکەن و بە بەڕێوەبردنی هەڵمەتی بەڕووچاندن و نەمام چاندن پەیامێکی بەرەنگاربوونەوە بە هێزەکانی ڕێژیمی ئێران دەدەن و بەم کارەیان دەڵین کە سەرەڕای ئەوەیکە ڕێژیم بەردەوام هەوڵی لە ناو بردن و فەوتاندنی ژینگەی کوردستان بە شێوازی جۆراوجۆر دەدات بەڵام خەڵکی کوردستان ژینگە پارێزان و هەموو چالاکانی مەدەنی و ئەنجومەنە کۆمەلایەتیی و فەرهەنگییەکان پێکەوە یەکدەنگ و یەکدڵ هەول بۆ ئاوەدان کردنەوەی کوردستان دەدەن.