بەرزبوونەوەی ئاماری تەڵاق‌و دابەزینی پێكهێنانی ژیانی هاوبەش لە پارێزگای سنە

بەڕێوەبەری گشتیی سەبت‌و ئەحواڵی پارێزگای سنە وێڕای وریاكردنەوە سەبارەت بە بابەتی تەڵاق گوتی لە حاڵێك‌دا كە لەمساڵ‌دا ڕێژەی پێكهێنانی ژیانی هاوبەش لەم پارێزگایە دابەزیوە بەڵام ئاماری تەڵاق بە شێوەیەكی بەرچاو بەرزبۆتەوە.
موحسێن ئاقایی دەڵێ لە ماوەی ٨ مانگی ڕابردوودا لەم پارێزگایە ١٠ هەزارو ٨٥٠ حاڵەتی پێكهێنانی ژیانی هاوبەش تۆمار كراوە كە لە چاو ساڵی پێشوو هەر لەم ماوە دیاریكراوەدا سەدی ١١ کەمی کردوە.
ناوبراو وێڕای ئاماژە بە ئاماری تەڵاق‌و وریاكردنەوەی سەبارەت بەم بارودۆخە گوتی، لە ماوەی ٨ مانگی ئەمساڵ‌دا ٣ هەزارو ٢٦٣ بابەتی تەڵاق لەم پارێزگایە تۆمار كراوە كە لە چاو ساڵی پێشوو سەدی ٤ بەرزبۆتەوە.
ناوبراو هەروەها دەڵێ بەپێی لێكۆڵینەوەیەك كە لەلایەن ئیدارەی گشتیی سەبت‌و ئەحواڵی ئەم پارێزگایە كراوە لە هەر ٤ بابەت پێكهێنانی ژیانی هاوبەش یەكیان هەڵدەوەشێتەوەو لە نێو شارەكانی ئەم پارێزگایەی وەك قوڕوە و كامیاران زۆرترین ڕێژەی تەڵاق لە ئاستی ئەم پارێزگایەدا تۆمار كراوە.