لە درێژەی دەسبەسەرکردنەکاندا لە پیرانشار دوو هاونیشتمانیی دیکە لەو ناوچەیە دەسبەسەر کران
بەپێی هەواڵی ڕێکخراوی مافی مرۆڤ بۆ ڕۆژهەڵاتی کوردستان (چاونیوز)، شەوی ڕابردوو ۲۸ی خەزەڵوەری ۹۹ی هەتاوی، هێزەکانی ئیدارەی ئیتلاعاتی پیرانشار هەڵیان کوتایە سەر ئاوایی چیانەی سەر بە شاری پیرانشار و دوو کەسیان بەناوەکانی زاهیر پەسوپیش و براکەی بەناوی فاروق پەسوپیش دەسبەسەر کرد و بۆشوێنێکی نادیار ڕاگوازران.
جێی وەبیرهێنانەوەیە کە لە ماوەی ٣ ڕۆژدا ئەوە هەشتەمین کەسە لە ناوچەی پیرانشار لە لایەن هێزەکانی ئیدارەی ئیتلاعات بە بێ هیچ بەڵگەیەکی قەزایی دەسبەسەر کراون.
ڕۆژی شەممە ٢٥ی خەزەڵوەریش، شەش کەس بە ناوەکانی نەجمەدین سوخەنوەر، شۆڕش عەبدوڵڵانژاد، سەلاح ئاجی و ڕەحمان ئاجی خەڵکی ئاوایی گەرگولی سەرێ هەروەها دوو کەسی دیکەی خەڵکی شیناوێ سەر بە شاری پیرانشار بە ناوەکانی عەلی جۆڵا و سمایل حاجی عەبدوڵڵا لەلایەن هێزە ئیتلاعاتییەکانەوە دەسبەسەر کرابوون، کە تا ئێستا سەرەڕای بەدواداچوونی بنەماڵەکانیان لە هۆکاری دەسبەسەر کردن و شوێنی ڕاگیرانی ئەو هەشت هاونیشتیمانییەی خەڵکی پیرانشار هیچ زانیارییەک لە بەردەستدا نییە.
شایانی باسە کە کاربەدەستانی کۆماری ئیسلامیی ئێران، ساڵانە بە سەدان کەس لە خەڵکی بێ تاوان دەگرن و تۆمەتی جۆراجۆریان وەپاڵدەدەن و بە بەسەرداسەپاندنی حوکمی ناڕەوا دەیانخەنە بەندیخانەکانەوە.
