هێزەکانی پاسگای هەورامانی تەخت کاسبکارێکی خەڵکی ئەو شارەیان کوشت.
بە پێی هەواڵی گەیشتوو بە ناوەندی ڕاگەیاندنی حیزبی دێموکراتی کوردستان، ئێوارەی ڕۆژی سیشەممە ٢٧ی خەزەڵوەری ٩٩ی هەتاوی،هێزەکانی ڕێژیم لە پاسگای هەورامانی تەخت بە شێوەیەکی کوێرکوێرانە تەقەیان بەرەو ناو شاری هەورامان کرد کە لە ئاکامدا کەسێکی کاسبکاری خەڵکی ئەو شارە بە ناوی سەعدی رۆستەم زادە کوڕی ساحب تەمەن ٣٥ ساڵە کوژرا.
شایانی باسە کە هێزەکانی ڕژیم تەرمی سەعدی رۆستەم زادەیان بەرەو نەخۆشخانەی شاری مەریوان ڕاگواست بەڵام لە ترسی ناڕەزایەتی خەڵک تەرمەکەیان بۆ نەخۆشخانەی سنە گواستەوە و دواتر بە خەڵکیان ڕاگەیاند بەو مەرجە تەرمی سەعدی ڕۆستەم زادە ڕادەستیان دەکەنەوە کە هەر ئەوشەو سپەردە بکرێ.
هەر دوێنێ شەو دوای ئەو ڕووداوە خەڵک هێرشیان کردە سەر پاسگای هەورامان و شەڕ و تێکەڵچوون لە نێوان خەڵک و پاسگا هاتە ئاراوە،هێڵی ئینترنێتی ناوچەی هەورامان تا دەرنگانی شەو پچڕا و هێزەکانی ڕێژیم هەوڵیاندا کە پێش بە بڵاو بوونەوەی هەواڵەکە بگرن.
جێگای ئاماژەیە سەعدی ڕۆستەم زادە خێزاندار بوو و منداڵێکی لە پاش بە جێ ماوە.
