لە سەرەتای مانگی ڕابردوو، كۆمەڵەی كەشتو سەنعەتی شاری مەهاباد پاش ماوەیەك قەیران، لە ڕێگەی مزایەدەوە بە یەكێك لە خاوەن قەرزەکان درا ،بەڵام گیروگرفت و داوای كرێكارانی ئەم كۆمەڵەیە هەروەها درێژەی هەیە.
ئەم كۆمەڵەیە بە ٤ شیركەتی ژێركۆماری خۆی وەک كوشتارگای سەنعەتیی مریشكو حەیوانو چەند کۆمەڵە جووجەخانە لە ساڵی ٨٦ بە كەرتی تایبەت درا.
كرێكارانی كەشتو سەنعەتی مەهاباد بە هەواڵدەریی ئیلنایان ڕاگەیاندوە كە یەكەكانی بەرهەمهێنانی سەنعەتیی ئەم كۆمەڵەیە بە ٣٠٠ كرێكارەوە، لە سەرەتای ئەسپاردنی بە كەرتی تایبەت تووشی قەیران هاتووە كە لە درێژەی ئەم بارودۆخەدا جگە لە ناتوانایی لە پێدانی بەڵێنییە ماڵییەكانی خۆی بۆ ئیدارەكانی دارایی، ئاو و بەرق و بانكەكان و هەموو كەسایەتییە ڕاستەقینەو حقووقیییەكان، لە پێدانی مووچە بە كرێكارانیش تووشی كێشە بووە.
ئەوان دەڵێن وادیارە یەكێك لە داواكارەکانی شیركەتی سەوزی مەهاباد توانیویەتی لە ڕێگەی قانوونییەوە حوكمی فرۆشتنی مزایدەیی ئەم كارخانەیە وەربگرێو لە ئەنجامدا پاش تێپەڕكردنی قۆناغە قانوونییەكان بۆخۆی ببێتە خاوەنی كارخانەكە.
بە قسەی ئەم كرێكارانە ئەوان تا پێش گۆڕدرانی خاوەنی كەشتو سەنعەتی سەوزی مەهاباد لە ڕێگەی ئیدارەی بەشێكی ئەم كۆمەڵەیە، بەشێكی پارەكەیان وەردەگرتەوە، بەڵام پاش فرۆشرانیو ڕادەست كرانی بە خاوەنی نوێ، ئەوەندەش کە هەبوو ویشکایی هاتووە.
ئەوان دەڵێن ئەم بارودۆخە لە حاڵێك دایە كە ئەو کارخانەیە لە بابەت مووچەو هەقدەستی كرێكاران، هەقی بیمەو ساڵیانەوە سەرجەم بڕی زیاتر لە ١١ میلیارد تمەن كرێكارەكان قەرزدارە.
