بەرپرسانی دەوڵەتی یاسایی یەمەن بە ڕێبەری” عەبدربە مەنسوورهادی” سەرۆککۆماری دەوڵەتی یاسایی یەمەن، شەوی سێشەممە ٢٠ی خەزەڵوەری ٩٩ی هەتاوی، لە وتووێژێکدا لە گەڵ “ئێلیۆت ئابرامز” نوێنەری تایبەتی نێردراوی ئەمریکا بۆ یەمەن و “کریستۆفێرهێنزل” باڵوێزی ئەمریکا لە یەمەن، جەختیان لە سەر ڕووبەڕووبوونەوەی دەستێوەردانەکانی ڕێژیمی کۆماری ئیسلامیی ئێران، لە یەمەن و ناوچەکە بە گشتی کردەوە.
بەپێی ڕاگەیاندنی هەواڵدەرییە فەرمییەکانی یەمەن،”عەبدربە مەنسوور هادی” سەرۆککۆماری دەوڵەتی یاسایی یەمەن، شەوی سێشەممە لە چوارچێوەی هاوکارییەکانی نێوان یەمەن و ئەمریکا و چۆنیەتی ڕووبەڕووبوونەوە بە دژی ڕێژیمی ئێران و دەستێوەردانەکانی ئەو ڕێژیمە و ناردنی بە قاچاخی چەکوچۆل بۆ میلیشیا تێرۆریستە حووسییەکان و هەروەها کەڵک وەرگرتن لە وڵاتی یەمەن بۆهەڕەشە و هێرش کردنە سەر وڵاتانی ناوچەکە وتووێژێکی لە گەڵ نوێنەری تایبەتی ئەمریکا و باڵوێزی ئەو وڵاتە لە یەمەن کرد و داوای لە وڵاتی ئەمریکا کرد کە ڕێکارێکی ستراتێژیکی بە دژی ڕێژیمی کۆماری ئیسلامیی ئێران بگرنە بەر.
نوێنەرانی ئەمریکا لەم دانیشتنەدا بە پشتیوانی لە هەوڵەکانی دەوڵەتی یاسایی یەمەن بۆ گەیشتن بە ئاشتی و ڕووبەڕووبوونەوەی دەستێوەردانەکانی ڕێژیمی ئێران، بەڵێنی هەموو هاوکارییەکیان بە دەوڵەتی یاسایی یەمەندا و، ڕایانگەیاند کە ئەمریکا بە هەموو هێز و توانایەوە وێڕای هاوپەیمانەکانی لە ناوچەکەدا ڕووبەڕووی دەستێوەردانەکانی ڕێژیمی گەندەڵ و تێرۆریستی ئێران دەبێتەوە.
لە لایەکی دیکەوە سەرۆککۆماری دەوڵەتی یاسایی یەمەن، وێرای سپاسی دەوڵەتی ئەمریکا، جەختی لەسەر ئەوە کردەوە کە هاوکارییەکانی نێوان یەمەن و ئەمریکا لە هەمبەر ڕووبەڕووبوونەوەی تێرۆر و دەستێوەردانەکانی ڕێژیمی کۆماری ئیسلامیی ئێران لە یەمەن و ناوچەکەدا جێگای پێزانین و بایەخی تایبەتیان هەیە.
