شەڕ و تێكهەڵچوونی ئەرتەشی توركیە لە شەقامكانی ئامەد

شەڕ و تێكهەڵچوونی چەكدارانەی ئەرتەشی توركیە لەگەڵ هێزەكانی پارتی كرێكارانی كوردستان (پ ك ك) لە كۆڵانەكانی ئامەدو ناوچەكانی دیكەی باكووری كوردستان هەروا بەردەوامە.
بەپێی ڕاپۆرتی هەواڵدەریی فەرانسە تانك‌و تەك تیرئەندازەكانی ئەرتەشی توركیە هەروا لە شەڕ و پێكدادان لەگەڵ هێزەكانی پارتی كرێكارانی كوردستان بەردەوامن‌و درێژە بە پێشڕەویی خۆیان لە شاری ئامەد دەدەن‌و ئەم شەڕو عەمەلیاتە گەیشتۆتە ئەم گەڕەك‌و ناوچانەش كە شوێنی نیشتەجێ بوونی خەڵكی مەدەنین.
خەڵكی شاری دیاربەكر ڕایانگەیاندوە كە سەربازەكانی ئەرتەشی توركیە وێڕای مەئموورانی پۆلیسی ئەم وڵاتە بە باتووم‌و گازی فرمێسكڕێژ هێرشیان كردۆتە سەر خۆپێشاندەران‌و لە ڕەوتی ئەم شەڕ و لێک‌دانەدا كۆمەڵێكی زۆریش لە خەڵكی بێدیفاعی ئەم ناوچانە بریندار بوون.
لە ڕۆژی ١١ی سەرماوەزەوە تا ئێستا بە گشتی بارودۆخی نائاسایی باڵی بە سەر زۆربەی گەڕەکەکانی ئەم شارەدا كێشاوە‌و هێرشی ئەرتەشی توركیە بۆ سەر بنكە‌و بارەگاكانی (پ ك ك) لە ڕۆژی چوارشەممە ٢٥ی سەرماوەزەوە تا ئێستا بۆتە هۆی كوژرانی زیاتر لە ١٠٠ كەس.
هەواڵدەریی “فۆرات نیوز” سەر بە پارتی كرێكارانی كوردستانیش ڕایگەیاندوە كە لەم شەڕ ولێکدانەدا ٨ کەسی مەدەنیش كوژراون.