خوێندكارێكی كورد لە حاڵێكدا كە سزای زیندانیی ٢٠ مانگەی خۆی کێشا، بەڵام ڕێگەی پێ نەدراوە دوایین ساڵی خوێندنی خۆی تەواو بكا.
بەپێی ڕاپۆرتی ئاژانسی هەواڵدەریی موكریان، زانكۆی پەیامی نووری مەریوان بە چەند هۆكاری ناڕوون ڕێگەی بە دانا لەنجاوایی خوێندكاری دوایین ساڵی كارناسیی لقی ئابووریی جووتیاری نەداوە كە درێژە بە خوێندنەکەی بدا.
ماوەی حوكمی ئەم خوێندكارە كوردە لە ڕێكەوتی ٢٦ی خەرمانانی ئەمساڵ تەواو بووەو پاش بەدواداچوونی پێویستو پاش ئەوەی كە ئەم خوێندكارە لە زانكۆ ناونووسی كردۆتەوەو تێرمی پاییزیی خۆی هەڵبژاردووە، پێیان ڕاگەیاندووە كە چی دیكە ناتوانێ لەم زانكۆیەدا درێژە بە خوێندن بدا.
دانا لەنجاوایی لە پێوەندی لەگەڵ هۆكارەكانی ڕێگری كردن لە دەرس خوێندنی بە هەواڵدەریی موكریانی ڕاگەیاندووە، کە پاش ئەوەی لە زانكۆی مەریوان ناهومێد بووم سەردانی ناوەندی خوێندنی باڵای پەیام نوور لە پارێزگام كرد، بەڵام دواتر دوكتور مرادی سەرۆكی پەیامی نووری پارێزگای سنە پێی گوتم ئەوە لە دەستی ئێمەدا نییەو ناتوانین هیچ كارێكت بۆ بكەین.
ناوبراو لە درێژەی قسەكانیدا گوتوویەتی “ئەوە لە حاڵێك دایە كە من لە نێو زینداندا لە تاقیكارییەكاندا بەشداریم دەكردو هیچ كێشەیەكم بۆ دەرس خوێندن نەبوو، تەنانەت بۆ ئەم تێرمەش خۆم ئامادە كردبوو و شەهریەكەشم تێ كردبوو.”
دانا لەنجاوایی ڕۆژی ٥ی ڕێبەندانی ١٣٩٢ پاش كۆبوونەوەی سەرشەقامی خەڵكی مەریوان بۆ ناڕەزایەتیی دەربڕین بە ئێعدامكرانی ٣ كەس لە زیندانەكانی كوردستان دەستبەسەرو دوای دادگاییکردنی حوكمی ٢٠ مانگ زیندان و ٥٠ زەربە قامچیی بەسەردا سەپاو ڕاپێچی زیندانیان كرد.
دانا لەنج ئاوایی پێشتریش لە ساڵی ٨٩ بەهۆی بەشداری كردن لە چالاكییە خوێندكارییەكان دەستبەسەرو سزای ساڵێک زیندانیی تەعلیقی بۆ ماوەی ٥ ساڵ بەسەردا سەپابوو.
