بەپێی هەواڵی تۆڕی مافەکانی مرۆڤی کوردستان، حەسەن ڕەستگاری‌مەجد، بەندکراوی سیاسی کورد بە مەبەستی دەربڕینی ناڕەزایی لە هەمبەر زەوت کردنی ناسنامەکەی لە لایەن ڕێژیمی ئێران، لە زیندانی ورمێدا مانی لە خواردن گرتووە. ئەم هاووڵاتییە کوردەی خەڵکی تورکیە کە دوای نیشتەجێبوون لە ئێران لە ساڵی ١٣٧١دا ناسنامەی ئێرانیی وەرگرتبوو، بەپێی حوکمی دادگا دەبێ ئێران بەجێ بێڵێ و بگەڕێتەوە بۆ تورکیە.
سەرچاوەیەکی ئاگادارلە دۆسیەی ئەم بەندکراوە سیاسییە لە وتووێژێکدا لەگەڵ تۆڕی مافەکانی مرۆڤی کوردستان، وێڕای پشتڕاستکردنەوەی ئەم هەواڵە وتی: ڕەستگاری‌مەجد کە لە بەندی دەرووندەرمانیی بەندیخانەی ورمێدایە، ڕۆژی چوارشەممە ٩ی ڕەزبەر بە نووسینی نامەیەک بۆ بەرپرسانی بەندیخانەی ناوەندیی ورمێ، داوای لێ کردن چارەنووسی ناسنامەکەی ڕوون بکەنەوە.
بەپێی شایەتنامەیەکی خەڵکی ناوچەکە، کۆمەڵێک لە هاووڵاتیانی ورمێ شایەتییان داوە کە بنەماڵەی ئەم بەندکراوە سیاسییە پێش شۆڕشی گەلانی ئێران” “١٣٥٧ی هەتاوی، لە ڕۆژهەڵاتی کوردستانەوە کۆچیان کردۆتە تورکیە و بە بنەچە کوردی ڕۆژهەڵاتی کوردستانن.
بە وتەی سەرچاوەکە، ئەم بەندکراوە سیاسییە بە بنەچە کوردە و خەڵکی ناوچەی ورمێیە، ناسنامەی تورکیەشی هەیە ناوبراو ساڵی ١٣٧١ی هەتاوی لەگەڵ بنەماڵەکەی گەڕایەوە ئێران، بەڵام دوای ئەوەی دەستبەسەر کرا دادگای ورمێ ناسنامەی لێ وەرگرتەوە و بەڵگەنامەکانی بە نایاسایی لە قەڵەم دا و هەر بەم تۆمەتانەش بە ٣ساڵ بەندکردن و ٣ میلیۆن تمەن پێبژاردن و دەرکردن لە ئێران سزا دراوە.
لە درێژەی ڕاپۆرتی ئەم سەرچاوەیەدا هاتووە کە، بنەماڵەی ئەم بەندکراوە دوای سەپاندنی ئەم سزایە مافی خوێندن و ژیان کردنیان لە ئێران لێ قەدەغە کراوە و هەر بۆیە بۆ گەڕانەوەی بۆ تورکیە چەند مانگێک لەمەوپێش داوایان کردووە بگوازرێتەوە بۆ بەندیخانەی تورکیە، بەڵام بەرپرسانی کۆماری ئیسلامی لە وەڵامی ئەم داواکارییەدا بە وەزارەتی دەرەوەی تورکیەیان ڕاگەیاندووە کە ناوبراو ناسنامەی ئێرانیی هەیە و بەپێی یاساکانی ئێران ڕادەستی تورکیە ناکرێتەوە.
بە وتەی ئەم سەرچاوەیە، حەسەن ڕەستگاری‌مەجد لە ئێستادا چارەنووسی نادیارە، نە ڕادەستی تورکیە دەکرێتەوە و نە دان بە ناسنامە ئێرانییەکەیدا دەنرێت.
لەم ساڵانەی ڕابردوودا ئەمە سێهەمین جارە کە ناوبراو بۆ دەربڕینی ناڕەزایی لە هەمبەر زەوت کردنی ناسنامەکەی مان لە خواردن دەگرێت.
شایانی باسە کە حەسەن ڕەستگاری‌مەجد لە سەرماوەزی ١٣٩٥یشدا بۆ دەربڕینی ناڕەزایی بەرانبەر بە دۆسیەی ناڕاستی ڕێکخراوە ئەمنییەکان و ڕەتکردنەوەی داواکاری پێداچوونەوەی دادگاییکردنی، ٣٢ ڕۆژ مانی لە خواردن گرتبوو.
ناوبراو هاوکات لەگەڵ مانگرتنەکەیدا لە ژووری تاکەکەسیی بەندیخانەی “ورمێ”وە گواسترایەوە بۆ لقی ١٠٤ی دادگای ورمێ و بە تۆمەتی تێکدانی ئارامی و نەزمی بەندیخانە دادگایی کرا، دواجار ئەم دادگایە لە بەفرانباری هەمان ساڵدا سزای ٢٠ قامچی و ٣ مانگ بەندکردنی بەسەردا سەپێندرا.
ئەم بەندکراوە سیاسییە بە گشتیی حوکمی ١٩ ساڵ و ٣ مانگ بەندکردنی بۆ بڕاوەتەوە کە بەپێی مادەی ١٣٤ی یاسای سزادانی ئیسلامی “یاسای کۆکردنەوەی حوکمەکان” ١٥ ساڵ لەم سزایە دەچێتە بواری جێبەجێکردنەوە.
