شەوی هەینیی حەوتووی ڕابردوو، كەسو كاری كوژراوێك لە مەریوان لە هەوڵێكی گرینگو شایاندا، پاش ٦ ساڵو نیو لە بكووژی كوڕەكەیان خۆش بوون كە بە ئێعدام مەحكووم كرابوو.
بەپێی ڕاپۆرتی هەواڵدەریی موكریان، فایق كەریمی یەكێك لە ئەندامانی ڕێكخراوی بارانی ڕەحمەتی مەریوان وێڕای باس كردن لەوەی كە ٦ ساڵو نیو لەمەوبەر لە شەڕو لێکدانی دوو لاو لەسەر كێشەی بنەماڵەیی، یەكێك لەم دوو لاوە كوژرا، گوتی: پاش تێپەڕینی ٦ ساڵو ٦ مانگ بەسەر گیرانی بكووژی ئەم لاوە، شەوی هەینی بنەماڵەی كووژراوەكە لە ماڵەكەی خۆی، بە ئامادە بوونی ئەندامانی ڕێكخراوی بارانی ڕەحمەتی مەریوانو كۆمەڵێك لە ئەنجومەنەكانو خانەنشین كراوانی پەروەردەو بارهێنان لە خوێنی كوڕەكەیان خۆش بوون.
ناوبراو لە درێژەدا گوتی: لە دوو ساڵ لەمەوبەرەوە ڕێكخراوی بارانی ڕەحمەتو كۆمەڵێك لە ڕیش سپیو پیاوماقووڵانی مەریوان بەشوێن لێبوردنی ئەم بنەماڵەیەدا بوون، لە ئەنجامدا پاش لەخۆبوردوویی بنەماڵەو بە تایبەت دایكی ئەم لاوە كووژراە، ڕۆژی هەینی ڕێكەوتی ٢٠ی سەرماوەز ئەم بنەماڵەیە چاوپۆشییان لە ئێعدام كرانی بكووژی ڕۆڵەكەیان كردو بەم شێوەیە ئەم كەسە ژیانی پێ بەخشرایەوە.
ئەم ئەندامەی ڕێكخراوی بارانی ڕەحمەت، پشتڕاستی كردەوە: ئێستا بكووژی ئەم كوڕە لە زیندانی سنە بەند كراوەو بەم زووانە پاش جێبەجێ كرانی كاروباری ئیداری لە زیندان ئازاد دەكرێ.
