عێراق: داخرانی باڵوێزخانەی ئەمریکا لە پێناو بەرژەوەندییەکانی بەغدا نییە
ئەمریکا هەڕەشە لە عێراق دەکا و دەڵێ: ئەگەر دەوڵەتی ئەو وڵاتە بۆ ڕاوستانی هێرشی میلیشیاکانی سەر بە ڕێژیمی ئێران بە دژی ئەمریکاییەکان، هێچ هەنگاوێک هەڵنەهێنێتەوە، باڵوێزخانەی ئەمریکا لە بەغدا دادەخەین.
فواد حوسێن وەزیری دەرەوەی عێراق ڕۆژی هەینی ١١ی ڕەزبەری ٩٩ی هەتاوی، لە پێوەندییەکی تێلێفۆنی لە گەڵ “مایک پۆمپێئۆ” وەزیری دەرەوەی ئەمریکا، باسی پێوەندییەکانی دوو وڵاتی کرد و هیوای خواست کە دەوڵەتی ئەمریکا جارێکی دیکە پێداچوونەوەیەک بە بڕیاری داخرانی باڵوێزخانەکەیان لە بەغدا بکەن.
لە بەیاننامەکەی وەزارەتی دەرەوەی عێراقدا “فواد حوسێن” وەزیری دەرەوی عێراق دەڵێ: دەوڵەتی عێراق نیگەرانە بۆ ئەو بڕیارەی دەوڵەتی ئەمریکا، لە بەرئەوەیکە ئەم بڕیارە لە پێناو بەرژەوەندییەکانی خەڵکی عێراقدا نییە.
لە درێژەی بەیاننامەکەدا هاتووە کە، دەوڵەتی عێراق هەموو ڕێکارە ئەمنییەتییەکان، ڕێکخراوەییەکان، سیاسی و دیپڵۆماسییەکانی بە ئامانجی کۆتایی هێنان بە کردەوە تێرۆریستییەکان و هێرشەکان بۆ سەر ناوچەی سەوزی بەغداو فڕۆکەخانەی بەغدا و بەرژەوەندییەکانی دەوڵەتی ئەمریکا جێبەجێ دەکا.
پۆمپێئۆ لە وڵامی بەیاننامەکەی وەزارەتی دەرەوەی عێراقدا دەڵێ: پێوەندییەکانی دەوڵەتی ئەمریکا لە گەڵ دەوڵەتی عێراق، بەرژەوەندی دوولایانەی تێدایە.
بە پێی ڕاپۆرتی واشینگتۆن پۆست، داوکاری ئەمریکا لە مستەفا کازمی سەرۆک وەزیرانی عێراق، لە هەمبەر کۆتایی هێنان بە میلیشیا تێرۆریستەکانی سەر بە ڕیژیمی ئێران، زۆری گوشار خستووەتە سەر کازمی و کابینەکەی، لە لایەکی دیکەیشەوە، دەوڵەتی عێراق ناتوانێت دەست لە ئەمریکا بەردا.
لە درێژەی ڕاپۆرتەکەی واشینگتۆن پۆستدا هاتووە کە دەوڵەتی عێراق زیاتر لەوە دەترسی، کە لە ئەگەری داخستنی باڵویزخانەکەی ئەمریکا لە بەغدا ، دەوڵەتی ئەمریکا بۆ پاراستنی بەرژەوەندییەکانی و لە ناو بردنی میلیشیاکانی سەربە ڕیژیمی ئێران هێرشێکی توندی سەربازی بکاتە سەرمیلیشیاکانی سەر بە ڕێژیمی ئێران لە عێراق.
