هەڵواسینی وێنەی خامنەیی و قاسم سولێمانی لە کەربەلا بووە هۆی تووڕە بوون و ناڕەزایەتی خەڵکی عێراق.
لە ڕۆژانی ڕابردوودا خەڵکی عێراق لە کەربەلا، تووڕەیی و ناڕەزایەتی توندی خۆیان سەبارەت بە هەڵواسینی وێنەکانی خامنەیی و قاسم سلێمانی فەرماندەی پێشووی سپای قودسی ڕێژیم دەربڕی و نیشاندانی ئەو وێنانە لە کاروانی زیارەتکەران لە زیارەتگای ئیمامی سێهەمی شێعەکان لە کەربەلا کە خۆیان بۆ ڕێوڕەسمی چلەی حوسێنی ئامادە کردبوو، ناڕەزایەتی خەڵکی لێکەوتەوە،.
میدیاکانی عێراقی باس لەوە دەکەن کە وێنەی خامنەیی و سلێمانی هۆکاری سەرەکی تووڕە بوونی خەڵکی عێراق و بە تایبەت کەربەلا بووە لەو ڕووداوەدا و عێراقییەکان کۆماری ئیسلامیی ئێران و بەتایبەت ئەو دووکەسە واتە خامنەیی و سلێمانی بە تێکدەری ئاسایش و سەقامگیریی عێراق دەزانن.
زۆرینەی خەڵکی شارەکانی باشووری عێراق داوایان لە بەرپرسانی دەولەتی کردوە کە هەڵواسینی ئەو وێنانە لە کاروانەکانی ئایینی قەدەغە بکەن و بە جێی ئەوان وینەی کەسایەتییەکانی عێراق هەڵواسن.
هاووڵاتییەکی شاری کەربەلا بە ماڵپەڕی ئەلعەرەبییەی ڕاگەیاند، کە میلیشیاکانی سەر بە ئێران تێچووی ئەو کاروانە دابین دەکەن بۆ ئەوەی وێنەی بەرپرسانی ڕێژیمی ئێران هەڵواسن.
ئەو هاوولاتییە ئاماژەی بەوەش کرد کە، بەرپرسانی خۆجێی دژی ئەو کردەوەیەن بەلام لە رووی ترسەوە بێدەنگیان هەڵبژاردوە، هەرچەند کە خەڵکی کەربەلا بە توندی ناڕەزایەتی خۆیان سەبارەت بە هەڵکردنی ئەو وێنانە دەربڕی بە تایبەت ئەو بنەماڵانەی کە ڕۆڵەکانی خۆیان لە شەڕی ٨ساڵەی عێراق و ئێران لە دەست داوە.
شایانی باسە کە کۆماری ئیسلامیی ئێران لە ماوەی دەیان ساڵ بە ئەستۆ گرتنی تێچووی ئاژاوەنانەوە و تێکدانی ئاسایشی وڵاتانی دراوسێ و بە تایبەت عێراق میلیشیا شیعەکانی دەستەمۆی خۆی بەردەوام سەروەت و سامانی خەڵکی ئێرانی کردۆتە دەستخۆشانەی کارەتێرۆریستییەکانی ئەو گرووپانە لە عێراقدا کەچی لە ماوەی چەندین مانگ خۆپێشاندانی خەڵکی عێراقدا دەرکەوت کە ئەو خەڵکە لە کۆماری ئیسلامیی و دەستێوەردانەکانی ئەو ڕێژیمە لە وڵاتەکەیاندا بێزارن.
هەروەها لەو خۆپێساندانانەدا بە فەرمانی خامنەیی هەزاران کەس لە خەڵکی عێراق بە دەستی چەکدارانی سەر بە خامنەیی کوژران و بریندار بوون.
