تەرخان نەكرانی بوودجە بۆ پرۆژەی “ئابشووران”ی كرماشان

تەرخان نەكرانی بوودجە بۆ جێبەجێ كردنی پرۆژەی “ئابشووران”ی كرماشان، بۆتە هۆی وەستان‌و دواكەوتنی ئەم پرۆژەیە.
بەپێی قسەكانی كاربەدەستانی شیركەتی ئاوی ناوچەیی پارێزگای كرماشان لە ساڵی ٩١ تا ئێستا تەنیا ٦٠ میلیارد تمەن بۆ پرۆژەی “ڕێكخستنی ئابشووران”ی كرماشان تەرخان كراوە، لە حاڵێكدا كە بڕیار بوو لە ساڵی ٩١ڕا تا ئەمساڵ ٢٠٠ میلیارد تمەن بۆ ئەم پرۆژەیە تەرخان بكرێ.
ئەمیریان، بەڕێوەبەری گشتیی شیركەتی ئاوی ناوچەیی پارێزگای كرماشان ڕایگەیاندووە لە بوودجەی ساڵی ڕابردوودا بڕی ١٢ میلیارد تمەن بۆ پرۆژەی ئابشوورانی كرماشان پەسند كرا، ناوبراو وەبیری هێنایەوە كە تەنیا سەدی ٥٠ ی ئەم بوودجەیە بۆ ئەم مەبەستە بەو پارێزگایە دراوە كە دەكاتە نزیكەی ٦ میلیارد تمەن.
بەم جۆرە كە ناوبراو باسی كردووە ئەگەر لەم ٣ ساڵەدا ئەم ٢٠٠ میلیارد تمەنەی كە بۆ ئەو پرۆژەیە وەبەرچاو گیرابوو پێی درابا، ئەمساڵ كاری ڕێكخستنی ئابشووران تەواو دەبوو. بە قسەی ئەم كاربەدەستە ساڵی ٩١ بەپێی بەراوردی كارناسان، بوودجەی ٢٠٠ میلیارد تمەنی بۆ ئەم پرۆژەیە دیاری كرا، بەڵام ئێستا بەم بڕە پارەیە كاری ئەو پرۆژەیە تەواو نابێ و دەبێ لەوە زیاتری بۆ تەرخان بكەن، ئەوە لە حاڵێك دایە كە تا ئێستاش تەنیا سەدی 25ی ئەم پرۆژەیە پێشکەوتوە.
شایانی باسە كاری وەڕێ خستنی چۆمی ئابشووران لە ساڵی ٩١ەوە ڕادەستی شیركەتی ئاوی ناوچەیی كرماشان كرا.