وەزیری دەرەوەی ئاڵمان لە هەولێر چاوی بە بەرپرسانی هەرێمی کوردستان کەوت.
فرانك ڤالتەر شتاینماینەر، وەزیری دەرەوەی ئاڵمان نیوەشەوی رابردوو گەیشتە هەولێرو لەلایەن نێچیرڤان بارزانی، سەرۆکوەزیرانی هەرێمی کوردستانەوە پێشوازیی لێکرا.
وەزیری دەرەوەی ئاڵمان لە دیدار لەگەڵ مەسعود بارزانی، سەرۆکی هەرێمی کوردستانیشدا وێڕای تاتوێی ڕەوشی ناوچەکەو بارودۆخی شەڕی داعش، بە پێزانینەوە باسی لە ڕۆڵی پێشمەرگەی کوردستان لەو شەڕەدا کرد.
بەر لە سەردانەکەی وەزیری دەرەوەی ئاڵمان، وەزارەتی بەرگری ئەو وڵاتە ڕایگەیاند کە ئاڵمان لەسەر ناردنی چەکی میلان بۆ پێشمەرگە بەمەبەستی شەڕی دژی داعش بەردەوام دەبێ.
وتەبێژی وەزارەتی بەرگری ئاڵمان دەڵێ لەنێو ئەو هاوکارییانەی کە بۆ پێشمەرگە دێ، بڕیارە سەدی ١٠ی هاوکارییەکان چەکی جۆری میلان بن. ئاڵمان تا ئێستا ٦٠ سیستەمی راکێتهاوێژی لە جۆر “میلان”ی لەگەڵ هەزار فیشەکی میلان بۆ پێشمەرگە ناردوە، هەروەها لەماوەی یەک ساڵی ڕابردوودا نزیکەی ١٨٠٠ تۆن کەرستەی نیزامیی داوەتە حکومەتی ناوەندیی عێراقو هەرێمی کوردستان.
