١٧ی خه‌رمانان ساڵوه‌گه‌ڕی مووشه‌ک‌بارانی قه‌ڵای دێموکڕاته. دوو ساڵ له‌مه‌وبه‌ر له وه‌ها ڕۆژێکدا سوپای پاسدارانی کۆماری ئیسلامیی ئێران سکرتاریای حیزبی دێموکڕاتی کوردستان له قه‌ڵای دێموکڕاتی که پلینۆمی کۆمیته‌ی ناوه‌ندیی حیزبی لێ به‌ڕێوه ده‌چوو کرده ئامانجی مووشه‌که بالیستیکه‌کانی خۆی. له ئاکامی ئه‌و هێرشه سامناک و بێ‌وێنه‌یه‌دا، وێڕای برینداربوونی ده‌یان که‌س له تێکۆشه‌رانی حیزبی دێموکڕات که له‌نێو واندا ژماره‌یه‌ک ژن و منداڵ ده‌بینران، چارده که‌س له ئه‌ندامانی ڕێبه‌رایه‌تی و کادر و پێشمه‌رگه‌کانی حیزبی دێموکڕاتی کوردستان شه‌هید بوون. ناوی ئه‌و شه‌هیدانه که له دڵی مێژووی مه‌زلومیه‌تی گه‌لی کورددا تۆمار کراون و به خوێنی خۆیان قه‌ڵای دێموکڕاتیان بۆ هه‌میشه کردۆته ڕووگه‌ی ئاڵی ئازادیی ڕۆژهه‌ڵات بریتی بوون له شه‌هیدان: برایم زێوه‌یی، که‌ریم مه‌هده‌وی، نه‌سرین حه‌داد، و ڕه‌حمان پیرۆتی (ئه‌ندامانی کۆمیته‌ی ناوه‌ندی)؛ سۆهه‌یلا قادری و هاشم عه‌زیزی (ئه‌ندامانی جێگری کۆمیته‌ی ناوه‌ندی)؛ محه‌ممه‌د حه‌سه‌نپوور و عوسمان عوسمانی (کادری به‌وه‌ج و ئه‌مانه‌تداری پێوه‌ندییه‌کانی حیزب)؛ قادر عیزەتی و شێرکۆ ڕه‌سووڵزاده (قاره‌مانانی به‌ئیمان و تاسه‌ر وه‌فاداری حیزب)؛ هاوڕێ کارساز، پێشه‌وا عه‌زیز پوور، جه‌ماڵ ئه‌کبه‌ری، و مه‌نسور ئه‌کبه‌رپوور (لاوانی پێشمه‌رگه‌ی به‌هه‌ست و له‌خۆبوردووی دێموکڕات). له ئاکامی ئه‌و مووشه‌ک‌بارانه‌دا هه‌روه‌ها دوو پێشمه‌رگه‌ی حدکا به ناوه‌کانی موختار قادرپوور و فاڕووق حه‌سه‌ن خه‌یات شه‌هید بوون.
مووشه‌ک‌بارانی قه‌ڵای دێموکڕات که له چه‌شنی خۆیدا بێ‌وێنه‌ترین هێرش و جینایه‌تی کۆماری ئیسلامی به‌دژی هێزێکی نه‌یاری خۆی له ده‌ره‌وه‌ی سنووره‌کانی بوو، هه‌م به‌پێچه‌وانه‌ی قانوونی نێوده‌ڵه‌تی و پێوه‌ر و بنه‌ما مرۆڤدۆستی و شارستانییه‌کان بوو، هه‌م له‌باری سیاسییه‌وه به‌هۆی تایبه‌تمه‌ندیی کات و هه‌لومه‌رجی به‌ڕێوه‌چوونی، نیشانه‌ی ئه‌وپه‌ڕی بێ‌پره‌نسیپی و سەرەڕۆیی و تێرۆریست‌بوونی ئه‌و ڕێژیمه بوو.
کۆماری ئیسلامی که ته‌نیا ڕۆژێک پاش به‌ڕێوه‌بردنی ئه‌و هێرشه سامناکه به‌رپرسایه‌تیی ئه‌و تاوانه دژه مرۆییه‌ی گرته ئه‌ستۆ، له هه‌لومه‌رجێکدا ده‌ستی بۆ ئه‌نجامدانی ئه‌و جینایه‌ته برد که چه‌ند مانگێک بوو هه‌م له نێوخۆی وڵاتدا له‌گه‌ڵ شه‌پۆلێکی به‌ربڵاوی دیکه‌ی ناڕه‌زایه‌تیی خه‌ڵک به‌ڕه‌وڕوو بوو، هه‌م له ئاستی نێونه‌ته‌وه‌یی و ناوچه‌ییدا به‌تایبه‌تی له‌لایه‌ن ئه‌مریکاوه که‌وتبووه به‌ر فشارێکی پێشتر نه‌دیتراو. ئاشکرایه که هه‌روه‌ک کاربه‌ده‌ستانی کۆماری ئیسلامی بۆخۆشیان ڕایانگه‌یاند، مه‌به‌ستی ڕێژیم له مووشه‌ک‌بارانی قه‌ڵای دێموکڕات ناردنی په‌یامێکێش بۆ کۆمه‌ڵگەی نێوده‌وڵه‌تی به‌تایبه‌تی وڵاته یه‌كگرتووه‌كانی ئه‌مریکا له‌پێوه‌ندی له‌گه‌ڵ جه‌ساره‌تی به‌رده‌وام و توانای تێکدهرانهی ڕێژیم له عێراق و له ناوچه‌دا بوو. به‌ڵام به له‌به‌رچاو گرتنی ڕه‌گ و ڕیشه‌ی حیزبی دێموکڕات له‌نێو خه‌ڵکی کوردستان و قابلیه‌تی ئه‌و حیزبه بۆ ڕێکخستنی خه‌باتی خه‌ڵک له هه‌لومه‌رجی له‌باردا، ئه‌وه‌ی پێش هه‌موو شتێک کۆماری ئیسلامی به‌دوایدا ده‌گه‌ڕا وه‌شاندنی زه‌برێکی کاریگه‌ری دیکه له سه‌رکردایه‌تیی حیزبی دێموکڕات و چاوترسێن کردنی حیزبه‌کانی ڕۆژهه‌ڵات و له‌په‌نای ئه‌وه‌ش فشارهێنانی زیاتر بۆ سه‌ر هه‌رێمی کوردستان بوو.
حاشای لێ ناکرێ کۆماری ئیسلامی له‌باری نیزامییه‌وه ئامانجی هێرشه دڕندانه‌که‌ی خۆی پێکا و پۆلێک له باشترین ئه‌ندامانی ڕێبه‌رایه‌تی و کادر و پێشمه‌رگه‌کانی که پڕکردنه‌وه‌ی جێگایان زۆر زه‌حمه‌ته، له حیزبی دێموکڕات و له بزوتنه‌وه‌ی هه‌قخوازانه‌ی گه‌لی کورد ئه‌ستاند. به‌ڵام له‌باری سیاسیییه‌وه کۆماری ئیسلامی به هیچ جۆر به مه‌به‌سته‌کانی خۆی نه‌گه‌یشت. حیزبی دێموکڕاتی کوردستان پشت‌ئه‌ستوور به ئیراده‌ی ڕێبه‌رایه‌تی و دڵسۆزی و فیداکاریی کادر و پێشمه‌رگه قاره‌مان و دڵسۆزه‌کانی خۆی، کاروانی بێ‌پسانه‌وه‌ی خه‌باتی خۆی به‌بێ یه‌ک ڕۆژ وه‌ستان درێژه پێدا و زۆر زوو له‌ژێر باری ئه‌م زه‌بره قورسه‌شدا پشتی ڕاست کرده‌وه. وره و ئیراده‌ی حیزبی دێموکڕات هه‌روه‌ها پشتگه‌رم به پشتیوانیی خه‌ڵکی کوردستان بوو که له ڕۆژی ٢١ی خه‌رماناندا بۆ مه‌حکومکردن و بێزاری ده‌ربڕین له‌و جینایه‌ته‌ی ڕێژیم که هاوکات بوو له‌گه‌ڵ ئێعدامی سێ که‌س له زیندانیانی سیاسی و مه‌ده‌نیی کورد له نێوخۆی وڵات، یه‌کگرتووانه‌ترین و سه‌رکه‌وتووترین حه‌ره‌که‌تی ئیعترازیی چوار ده‌هه‌ی ڕابردووی سه‌رتاسه‌ری کوردستانیان به‌دژی کۆماری ئیسلامی به‌ڕێوه‌برد. له‌لایه‌کی دیکه‌وه، ئه‌و جینایه‌ته شه‌پۆلێکی به‌ربڵاو له هاوپێوه‌ندی و دژکرده‌وه له‌نێو لایه‌نه کوردستانی و ئێرانییه‌کان و کۆڕ و کۆمه‌ڵه نێونه‌ته‌وه‌ییه‌کانی وه‌ڕێ خست که بۆ حیزبی دێموکڕات جێگای سه‌ربه‌رزی و شانازی و بۆ کۆماری ئیسلامییش مایه‌ی ڕیسوایی و شه‌رمه‌زاری بوو.
مووشه‌ك‌بارانی قه‌ڵای دێموکڕات بۆ جارێکی دیکه ڕووی ڕاستەقینەی کۆماری ئیسلامیی به جیهان نیشان دا و بۆ حیزبی دێموکڕات و خه‌ڵکی کوردستانیش بوو به ده‌رفه‌تێکی نوێ هه‌تا وره و ئیراده‌ی خه‌باتگێڕانه‌ی خۆیان به‌و ڕێژیمه نیشان بده‌نه‌وه. به‌ڵام جێگه‌ی داخه که نه پاش مووشه‌ک‌بارانه‌که و نه هه‌تا ئێستا مامه‌ڵه‌ی کۆمه‌ڵگەی نێوده‌وڵه‌تی و وڵاتانی ڕۆژئاوا به‌تایبه‌تی ئه‌مریکا له‌گه‌ڵ ئه‌و ڕێژیمه و ڕوانینیان بۆ پۆتانسیه‌ل و واقعیه‌ته‌کانی پێوه‌ندیدار به ئاینده‌ی ئێران، ستراتژییه‌کی ڕوون و مونسه‌جیمی به‌دژی کۆماری ئیسلامی به‌رهه‌م نه‌هێناوه که مه‌یدانی مانۆڕی تێکدهرانهی ڕێژیم له ناوچه‌دا به‌ته‌واوی به‌رته‌سک، و ده‌ستی سه‌رکوت و جینایه‌تی ئه‌و ڕێژیمه به‌دژی خه‌ڵک و ئازادیخوازانی کوردستان و ئێران کورت بکاته‌وه. له‌لایه‌کی دیکه‌وه، له‌گه‌ڵ ئه‌وه که هه‌ر له‌دوای مووشه‌ك‌بارانه‌وه خه‌ڵکی کوردستان وێڕای گوتنی “نا”یه‌کی به‌هێز به ڕێژیم، په‌یامی یه‌کگرتنیان بۆ هێزه سیاسییه‌کانی ڕۆژهه‌ڵات نارد، به‌داخه‌وه هێشتا یه‌کگرتن و هاوخه‌باتیی ڕاسته‌قینه و به‌كرده‌وه‌ی ئه‌و هێزانه له ئاستی زه‌رووره‌ته‌کانی ڕۆژ و چاوه‌ڕوانیی خه‌لکی کوردستاندا نییه.
له دووه‌مین ساڵوه‌گه‌ڕی مووشه‌ک‌بارانی قه‌ڵای دێموکڕاتدا وێڕای مه‌حکوم‌کردنه‌وه‌ی ئه‌و جینایه‌ته سامناکه‌ی کۆماری ئیسلامی، له‌گه‌ڵ ڕوحی شه‌هیدانی قه‌ڵای خوێناوی به‌ڵام هه‌رده‌م به‌پێوه‌ی دێموکڕات و سه‌رجه‌م شه‌هیدانی ڕێگای ڕزگاریی کوردستان په‌یمان نوێ ده‌كه‌ینه‌وه که هه‌روه‌ک پێشوو و به ئیراده و شێلگیری و به‌رپرسیارێتیی زیاتریشه‌وه له‌سه‌ر خه‌بات به‌دژی ئه‌و ڕێژیمه و بۆ دیفاع له مان و مه‌وجودیه‌تی خه‌ڵکی کوردستان هه‌تا وه‌دیهێنانی ئاواتی شه‌هیدان به‌رده‌وام ده‌بین.
سڵاو له شه‌هیدانی ١٧ی خه‌رمانانی قه‌ڵای دێموکڕات و هه‌موو شه‌هیدانی ڕێگای ڕزگاریی کوردستان.
ڕیسوایی و نه‌مان بۆ کۆماری تێرۆریستیی ئیسلامیی ئێران
ده‌فته‌ری سیاسیی حیزبی دێموکڕاتی کوردستان
١٥ی خه‌رمانانی ١٣٩٩ (٥ی سێپتامبری ٢٠٢٠)
