پرۆژه‌كانی نیشته‌جێ‌‌كردنی مه‌سكه‌نی ته‌عاونیی هونه‌رمه‌ندان له مه‌هاباد ئێستاش جێبه‌جێ نه‌كراوه، به‌ڵام ئه‌ندامانی ئه‌م ته‌عاونییه ده‌بێ‌هه‌موو مانگێك قیستی خانوویه‌ک به ده‌وڵه‌ت بده‌نه‌وه كه ئێستاش پێیان نه‌دراوه‌و تێیدا دانه‌نیشتوون.
پرۆژه‌ی ته‌عاونیی مه‌سكه‌نی مێهری هونه‌رمه‌ندانی مه‌هابادیش وه‌ك زۆربه‌ی پرۆژه‌كانی دیكه كه به پلانه به‌رزه‌فڕانه‌كانی ئه‌حمه‌دی‌نژاده‌وه پێوه‌ست بوون، هه‌ڵپه‌سێردراوه‌و گوایه ده‌وڵه‌تی نوێش نایهه‌وێ ئاوڕی لێ بداته‌وه.
گه‌ڵاڵه‌داڕشتنی سه‌ره‌تایی ئه‌م پرۆژه‌یه بۆ ساڵی ١٣٨٣ ده‌گه‌ڕێته‌وه‌و پاش ١١ ساڵ له حاڵی حازردا ئه‌م پڕۆژه‌یه تا ئێستاش به هیچ ئاکامێک نه‌گه‌یشتووه، به‌ڵام به‌م پێیه‌ی كه بانكی مه‌سكه‌ن ٥ ساڵ له‌مه‌وبه‌ر بۆ ئه‌م مه‌به‌سته وامی به ئه‌و خه‌ڵکه داوه، ئێستا ده‌بێ ئه‌وان ئه‌م وامه به ده‌وڵه‌ت بده‌نه‌وه. به واتایه‌كی دیكه ده‌بێ ئه‌وان وامی خانووبه‌ره‌یه‌ك بده‌نه‌وه كه ئێستاش كاره‌كه‌ی ته‌واو نه‌بووه‌و به ئه‌گه‌ری زۆر تا ساڵانێکی دیكه‌ش هه‌ر وه‌ك خۆی ده‌مێنێته‌وه.
زۆربه‌ی ئه‌ندامانی ئه‌م ته‌عاونییه چه‌ندین جار ڕایانگه‌یاندووه كه ساڵانێكه چاوه‌ڕوانی ته‌كمیل كرانی ئه‌م پرۆژه‌یه‌ن و بۆ تێ‌كردنی هه‌موو ئه‌م پاره‌یه كه سه‌ره‌تا قه‌رار بوو ٧ میلیۆن تمه‌ن بێ، تووشی چه‌رمه‌سه‌رییه‌كی زۆر هاتوون.
ئێستاش به ئه‌گه‌ری زۆرو به‌پێی ڕاگه‌یاندنی هه‌یئه‌تی به‌ڕێوه‌به‌رایه‌تی له دوایین كۆبوونه‌وه‌دا، ده‌بوایه له لایه‌ن ئه‌ندامانه‌وه بڕه پاره‌یه‌كی دیكه‌ش درابا و پاش ٨ ساڵ چاوه‌ڕوانیی جگه له كرێ خانووی زۆرو باقی ئه‌م خه‌رج‌و مه‌خارجه‌ی كه مه‌سكه‌نی مێهر له‌سه‌ر ده‌ستی داناون، ده‌بێ قیستی ئه‌م خانووانه‌ش بده‌نه‌وه كه تا ئێستاش نه‌یان‌دراوه‌تێ.
