سەرۆکی دیوانی سەرۆکایەتیی هەرێمی کوردستان ده‌ڵێ پێشوازی‌کردنی پاشای عه‌ڕه‌بستان لە سەرۆکی هەرێمی کوردستان پەیامێکی روون‌و ئاشکرای تێدایه‌و عه‌ڕه‌بستان پشتگیریی هه‌رێمی کوردستان ده‌کا.
دوکتور فوئاد حوسێن ده‌ڵێ شای عه‌ڕه‌بستان بەڵێنی داوە هاوکاریی ته‌واوی هەرێمی کوردستان بکاو كۆنسوڵخانه‌ش له كوردستان ده‌كاته‌وه.
دوکتور فوئاد حوسێن، سەرۆکی دیوانی سەرۆکایەتیی هەرێمی کوردستان ده‌ڵی جۆری پێشوازی شای عه‌ڕه‌بستان لە مەسعود بارزانی، سەرۆکی هەرێمی کوردستان، پەیامێکی روون‌و ئاشکرای تێدایه‌و ده‌ری ده‌خا کە ڕۆڵی کورد گرنگ‌و پڕبایەخە لە ناوچەکەدا، هەروەها شای عه‌ڕه‌بستان زۆر بە بایەخەوە سەیری رۆڵی هەرێمی کوردستان‌و هێزی پێشمەرگەی کردوه.
مه‌سعود باڕزانی له‌و حه‌وتوویه‌دا سه‌ردانی عه‌ڕه‌بستانی کردو به‌پێی قسه‌کانی دیوانی سەرۆکایەتیی هەرێمی کوردستان لەسەر په‌ره‌پێدان به پەیوەندییەکانی سعودیە‌و هەرێمی کوردستان‌و چۆنیەتیی رووبەڕبوونەوەی داعش‌و ئاڵوگۆره‌کان له رۆژهه‌ڵاتی نیوه‌ڕاست ئالوگۆری بیروڕاو ڕێککه‌وتن کراوه.
