زیاتر لە ١٦٠ كەس لە پارێزەرانی كوردو غهیرهکورد لە ئێران بە بڵاوکردنهوهی بەیاننامەیەك تیرۆری تاهیر ئەلچییان مەحكوم كرد.
بەدوای تیرۆركرانی تاهیر ئەلچی، سەرۆكی كانوونی پارێزەرانی ئامهد، زیاتر لە ١٥٠ كەس لە پارێزەرانی كوردو غهیره کورد له ئێران بە ئیمزاکردنو بڵاوکردنهوهی بەیاننامەیەك وێڕای مەحكومكردنی ئەم كردەوە تیرۆریستییە، داوایان لە ناوهنده نێودەوڵەتییەكان كرد كە بكەری ئەم تیرۆرە بدۆزنەوە تا سزای تاوانەكەی بدا.
لەم بەیاننامەیەدا وێڕای باس له بارودۆخی سیاسیی توركیە، حیزبی دادو گەشەو مودیرییەتی فیكریی ڕەجەب تەیب ئەردۆغان بە بەرپرسی ئەم هەلومەرجە زانراوهو هاتووه كە ئەم بارودۆخە هەلێكی لەبارە بۆ هەر چەشنە كردەوەیەكی تیرۆریستی له دژی هاووڵاتییانی كورد لەم وڵاتە،و هەر بۆیە تاهیر ئەلچی بوو بە قوربانیی ئەم هەلومەرجەی ئێستای توركیە.
ئهوانهی بەیاننامەکهیان ئیمزا کردوه وێڕای هاوخەمی لەگەڵ نەتەوەی كورد لە باكووری كوردستان، چالاكانی مافی مرۆڤو بنەماڵەی ناوبراو و مەحكومكردنی ئەم تیرۆرە، داوایان لە كۆرو کۆمهڵه نێودەوڵەتییەكانی وەك كۆمیسیۆنی مافی مرۆڤی ئورووپا، كۆمیسیۆنی مافی مرۆڤی ڕێكخراوی نەتەوەیەكگرتووەكان، یەكیەتیی ئورووپاو فیدراسیۆنی نێودەوڵەتیی كۆمەڵگەكانی مافی مرۆڤ كرد كە لە هەمبەر ئەم كردەوە تیرۆریستییە بێدەنگ نەبنو هەموو ڕێكارە مرۆییەكان بۆ بنهبڕكردنی توندوتیژی لە توركیەو ئاشكراكردنی بكەری ئەم تیرۆرە بگرنەبەر.
بڵاوکردنهوهی ئەم بەیاننامەیە لە لایەن پارێزەرانی كوردو غهیره کوردی دیكەی ئێران ئەگەرچی لە چەشنی خۆیدا جێی ڕێزو شایانی دەستخۆشییه، بەڵام ئەم پرسیارەش لە لای چالاكانی مەدەنی دروست دەكا كە چۆنه پارێزەرانی كوردو نەتەوەكانی دیكەی ئێران ڕۆژانە بە سەدان پێشێلكردنی مافی مرۆڤو زهوتکردنی مافە مهدهنیو سیاسییەكانی خهڵکی کوردستانو؛ بەتایبەت كوشتاری ناقانوونیی كاسبكارانو كۆڵبەرانی كورد لە ناوچە سنوورەكان دەبیننو چاوپۆشییان لێدەكەن، بەڵام بۆ ڕووداوهکانی دهرهوهی ئێران ئاوا زوو کاردانهوهیان دهبێ.
