مەسروو بارزانی: دابەشبوونی عێراق باشترین چاره‌سه‌ره‌ بۆ كێشەكانی نێوان بەغداو هەولێر

بەرپرسی ده‌زگای پاراستن، شوورای ئەمنیەتی هەرێمی كوردستان پێداگری كردوە كە باشترین ڕێگە بۆ چارەسەری كێشەكانی ئێستای نێوان بەغداو هەولێر دابەش‌كرانی عێراقەو بۆ هەر دوولا وا باشترە كە وەك دوو دراوسێ لەگەڵ یەكتر هه‌ڵسوکه‌وتیان هه‌بێ.
مەسروور بارزانی لە ڕەوتی دیدار لەگەڵ باڵوێزی نۆروێژ لە ئۆردۆن‌و عێراق‌و هەیئەتی هاوڕێی، وێڕای ئاماژە بە دەسكەوت‌و سەركەوتنەكانی هێزی پێشمەرگەی هەرێمی كوردستان لە بەرامبەر داعش‌و ڕزگار كرانی ناوچەیەكی بەربڵاو لە عێراق‌و هەرێمی كوردستان لە ژێر دەستی ئەم گرووپە تێرۆریستییە گوتی: لە نێو بردنی بە تەواو مانای داعش پێویستی بە هاوكاری‌و پشتگیریی هەرچی زیاتری پێشمەرگە لە لایەن كۆمەڵگای نێودەوڵەتی‌و په‌ره‌پێدان به‌ ناردنی هاوکاری‌یه‌ نیزامییەكان بۆ هێزی پێـشمه‌رگه‌ هه‌یه‌.
بەرپرسی ده‌زگای پاراستنی هەرێمی كوردستان‌و ئەندامی دەفتەری سیاسیی پارتی دێمۆكرات، لە بابەت كاروباری عێراق‌و بە تایبەت كێشەكانی نێوان حكوومەتی هەرێم‌و دەوڵەتی ناوەندیی عێراق پێداگری كردەوە كە ئەم گرفتانەی ئێستا كەلێنی نێوان چین‌و توێژ و تایفە جۆربەجۆرەكانی عێراق زیاتر دەكەن‌و باشترین ڕێگەچارە بۆ كێشەی نێوان هەولێر و بەغدا دابەش‌كرانی عێراقەو ئه‌وه‌ لە بەرژەوەندیی هەردوولا دایە كە وەك دوو دراوسێ لەگەڵ یەكتر پێوه‌ندییان هه‌بێ.
ناوبراو وەبیری هێنایەوە كە پێویستە بۆ چارەسەری گرفتەكانی ئێستای عێراق سەرنج بدرێتە ڕیشه‌و ماكەی ئەم گرفتانە‌و دەبێ كۆمەڵگای جیهانیش لەم بوارەوە ئەزموون لە بژێرەی دیكە وەربگرێ