قازانجی كانزاكانی كوردستان ناچێتە نێو گیرفانی خەڵكی کوردستانه‌وه‌

چالاكێكی ئابووری دەڵێ قازانجی كانزاكانی كوردستان ناچێتە نێو گیرفانی خەڵكی کوردستانه‌وه‌و
تەنیا قازانجی كانزاكانی كوردستان ئەوەیە كە كەسێك وەك نیگابان‌و چاوه‌دێر لە كانزاکه‌ دادمەزرێ‌و باقی خەڵكی ئەم ناوچانە لە قازانجی كانزاكان بە تەواوی بێبەش دەكرێن.
بەپێی ڕاپۆرتی ئاژانسی هەواڵدەریی موكریان تەنیا پارێزگای سنە بە سەرچاوەی كانزایی زۆ‌ و زەونەدەوە، پتر لە ٦٠٠ میلیۆن تۆن پاشەكەوتی كانزایی لە ٣٤٠ كانزای‌دا هەیە، بەڵام بە هۆی ئەوەی كە به‌رده‌کانی کانگاکانی کوردستان خاوفرۆش ده‌کرێن، قازانجه‌که‌ی ناچێتە نێو گیرفانی خەڵكی ئەم پارێزگایە‌و لە بەرامبەردا سەرجەم ئەم سامانە دەڕژێتە نێو گیرفانی كاربەدەستانەوە، ئەوە لە حاڵێك‌دایە كە بە چالاك‌كردنی كانزاكان‌و بەرهەم هێنانی مادە كانزاییەكان دەتوانن كێشەی بێكاری لە ناوچەكانی كوردستان بنبڕ بكەن.
ڕەزا ڕەشیدی، چالاكی ئابووری دەڵێ ئەم بەردە خاوانەی كە لە كانزاكانی كوردستان دەریان دێنن دەبردرێنە پارێزگاكانی دەوروبەرو پاش ئەوەی كە كاریان لە سەر كرا، بۆ فرۆشتن‌و به‌کارهێنان دووبارە دەیانگەڕێننەوە شوێنی خۆیان‌و لەم بەینەدا تەنیا سوودێك كە وەبەر كوردستان دەكەوێ ئەوەیە كە كەسێك وەك كێشكچی لە كانزاکان دادەمەزرێن، بەڵام خەڵكەكەی دیكە هیچ شتێكیان لەم سەرچاوانە پێ نابڕێ‌و تەنیا بەشێك كە لەم بەینەدا وەبەریان دەكەوێ بێكاری و هەژاری دەبێ.