د. قاسملوو؛ هێندەی دەیناسم، دەنووسم
مەلا بەختیار
ڕوانگەی دوور لە گۆشەگیری
ئەو پرسیارگەلە دەبێ دوور لە ڕوانگەی گۆشەگیری حیزبایەتیەوە وەڵام بدرێنەوە.
ئێستا، کە (٧٥) ساڵ بەسەر دامەزراندنی حیزبی دێموکراتدا تێدەپەڕێ، دەرکەوتوە کە کۆماری ئێسلامی ئێران، نە بە خەباتی چەکداری ڕۆژهەڵاتی کوردستان ناچار کراوە داخوازییە دێموکراسییەکانی گەلانی ئێران جێبەجێ بکا، نە جەنگی(٨)ساڵەی عێراقیش دژی ئێران، حکومەتی شیعەی ئێرانی ڕوخاند. ئەوەتانێ ساڵەهای گەمارۆ سەپێنراوەکانیش دژی ئێران، ئێرانی وەکو دۆخی گەمارۆدانی عێراقی سەردەمی سەدامیش لێ‌نەکردوە. وای دەبینم ئێران کەوتۆتە بەردەم دوڕێیانێک :
_ یان .. گۆڕینی حکومەتی ئێستای ئێران،
_ یاخود..چارەسەرکردنی ئاشتییانەی کێشەی کورد و گەلانی دیکەشە.
ئەگەر بەهەڵە نەچوبم، سیاسەتی نێودەوڵەتی و ئیقلیمی و ئێرانی وادەخوێنمەوە سازشێکی نێودەوڵەتی– ئیقلیمی بەڕێوەیە، بۆ ڕێکەوتنێکی ستراتیژی نوێ‌چەشن. جەخت دەکەمەوە ئەگەر بەڵێ -ئەگەر! – پڕۆژەیەکی وابێتە پێشەوە (وەکو ئێستای سووریە – ڕۆژئاوای کوردستان) حەق‌وایە هێزە سیاسییە کوردستانییەکان دەستخەڕۆی دروشمی دوورکوژە نەبن و بە پڕۆژەیەکی ڕیالیستی خۆیان بۆ ئەگەرێکی ئاوها ئامادە بکەن و بەرپرسیارێتیەکە پێکەوە بخەنە ئەستۆ!
من دڵنیام د.قاسملوو بمابا هەمو توانای خۆی بۆ پڕۆژەیەکی ئاوهای هاوبەش، بۆ چارەسەری ئاشتییانە دەخستەگەڕ.
پیرۆزتان بێت ساڵڕۆژە ئەڵماسیەکەتان، بەهیوام لەم ساڵڕۆژەدا هەڵسەنگاندنی هەمەلایەنە، بۆ خەبات و فۆرمیلاکردنی سیاسەتی حیزبی دێموکرات، لەبەر ڕۆشنایی ئەزمونی(٧٥) ساڵەتان بە ڕەخنە لەخۆگرتنیشەوە، بکەنە خەڵات و بەراتی یادەکە.
