بەرپرسانی عێراق لە هەمبەر کوژرانی دوو فەرماندەی پاسەوانی سنوور لە ناوچەی سیدەکان لە لایەن تورکیەوە هاتنە دەنگ و ناڕەزایەتییان دەربڕی.
بۆردوومانکردنی هێزەکانی پاسەوانی سنووریی عێراق لە هێرشێکی فڕۆکەی بێفڕۆکەوانی تورکیەدا لە ناوچەی سیدەکان کاردانەوەی زۆری بەدوادا هات. هەریەک لە سەرۆکایەتیی کۆمار، وەزارەتی دەرەوەی عێراق، هێرشەکەیان سەرکۆنە کرد و وەزارەتی دەرەوەی عێراق سەردانی “خوڵوسی ئاکار”، وەزیری بەرگریی تورکیەی هەڵوەشاندەوە کە بڕیار بوو ئەمڕۆ پێنجشەممە لەگەڵ بەرپرسانی بەغدا و هەولێر ئاڵۆزییەکانی سەرسنوور تاوتوێ بکا.
“ئەحمەد سەحاف”، گوتەبێژی وەزارەتی دەرەوەی عێراق ڕایگەیاند: “بۆردومانەکانی تورکیە زیانی زۆریان بەژێرخانی وڵات گەیاندوە و كوژران و برینداربوونی هاووڵاتیانی هەرێمی كوردستانی عێراقیان لێكەوتوەتەوە. بوونی هێزی توركیە لەنێو عێراق لە “باشیك” بێ یان هەر ناوچەیەكی دیكە نایاساییە.
گوتەبێژی وەزارەتی دەرەوەی عێراق هەروەها گوتی: “دژی تورکیە هەموو بژاردەكان لەبەردەم عێراق كراوەیە، دەكرێت پشت بە یاسا و ڕێککەوتنە نێودەوڵەتییەكان ببەستین. حکوومەتی عێراق کارتی بەهێزی لەبەردەستە چونکە قەبارەی ئاڵوگۆڕی بازرگانی نێوان عێراق – تورکیە ساڵانە زیاد لە ١٦ ملیار دۆلارە و دەیان کۆمپانیای تورکی لە عێراق کار دەکەن.
هاوکات لیوا “یەحیا ڕەسوول”، گوتەبێژی فەرماندەی گشتی هێزە چەکدارەکانی عێراق هۆشداری دایە تورکیە و ڕایگەیاند، لە ڕشتنی خوێنی هاووڵاتیان خۆش نابین.
لێژنەی پێوەندییەكانی دەرەوەش لە پەرلەمانی عێراق بۆردومانەکانی توركیەی سەركۆنە کرد و داوای لە حکوومەتی عێراق کرد کاردانەوەی تووندی بەرامبەر تورکیە هەبێ.