مەسروو بارزانی، سەرۆكی ده‌زگای پاراستنی هەرێمی كوردستان دەڵێ بێتوو كۆمەڵگای جیهانی لەسەر ئامانجی لەنێوبردنی داعش سوور بێ، لە ماوەی چەند مانگ‌داو تەنانەت لە چەند حەوتووش‌دا دەتوانین ئەم گرووپە بە چۆك‌دا بێنین.
ئەم كاربەدەستە پلەبەرزەی هەرێمی كوردستان لە لێدوانێك‌دا بۆ بی بی سی هیوای خواستووە كە پەلامارەكانی پاریس، زەنگێكی مەترسیدار بێ بۆ وڵاتانی ڕۆژاوایی تا هەموو توانای خۆیان بۆ بنه‌بڕ كردنی داعش بخەنە گەڕ.
ئەم قسانەی ناوبراو چەند ڕۆژ پاش ئازادیی شنگال لە دەستی هێزەكانی داعش بووە. ئەوە لە حاڵێك دایە كە تا ئێستاش چەند بەشێكی بەربڵاو لە خاكی وڵاتانی سووریە‌و عێراق هەروا لە بن دەستی ئەم گرووپە تێرۆریستی‌یە دایە.
مەسروور بارزانی كە لە مەقەڕی فەرماندەیی هێزی پێشمەرگە لە نزیك شنگال قسەی دەكرد، بە بی بی سی ڕاگەیاندوه، سەرەڕای ڕزگار كردنی شاری شنگال لە چنگی داعش، بەڵام ئەم گرووپە ئێستاش بە تەواوی لاواز نەبووە.
سەرۆكی ده‌زگای پاراستنی هەرێمی كوردستان لە درێژەی قسەكانیدا ده‌ڵێ: ئێستاش ناتوانین بڵێین داعش تێک شکاوه، لەوانەیە لە هێندێك شوێن پاشەكشە بەم گرووپە كرابێ، بەڵام ئەم جینایەتكارانە شێوازی جۆربەجۆر بۆ تۆقاندنی خەڵك بە كار دێنن‌و ئەگەر پێشیان پێ نەگیرێ و فشاریان بۆ نەهێنن، ڕەنگە گەلێك تاوان و كارەساتی دیكە بخوڵقێنن.
بارزانی لە بەشێكی دیكەی قسەكانیدا باسی لە وە كرده كە ئەگەر وڵاتانی ڕۆژاوایی نایانەوێ هێزی وشكانی بنێرن، پێویستە لە عێراق‌و سووریە زیاتر پشتیوانی لە هێزی پێشمەرگە بكەن تا بتوانن بە ئامادەیی زیاترەوە لەگەڵ ئەم گرووپە ڕووبەڕوو ببنەوە.
ناوبراو لە هەمان حاڵدا وەبیری هێنایەوە كە هێزە كوردییەكان هیچ مەیلیان لەوە نییە كە بچنە ئه‌و ناوچانه‌ی به ئی خۆیانی نازانن‌و بە تەمای داگیركاری نین.
