سازمانی خەباتی کوردستانی ئێران بە بۆنەی کۆچی دوایی کاک جەلیل گادانی، پەیامێکی بڵاو کردەوە.
دەقی پەیامەکە:
بە داخەوە كاک جەلیل گادانی كەسایەتیی دیاری ڕێگەی كوردایەتی و ئازادی‌خوازی كۆچی دوایی كرد. كاک جەلیل گادانی نزیک به حه‌وت ده‌یه ژیانی خۆی ته‌رخان کرد بۆ خزمه‌ت به خەباتی ماف‌خوازانەی گەلی كورد لە كوردستانی ئێران و، خەباتی ڕەوا لە بەرانبەر ڕێژیمی دیكتاتۆریی ئاخوندەكان لە ئێراندا. كاک جەلیل
گادانی هەمیشە باوەڕی وا بوو نابێ لەگەڵ دەسەڵاتی ئاخوندەكان لە ئێران وتووێژ و دانوستان بكرێ و باوەڕی بە خەباتی شێل‌گیرانە بۆ گەیشتنی كورد بە مافەكانی بوو، هەروەها باوەڕی وا بوو، ڕووخانی یەكجاریی دەسەڵاتی دیكتاتۆری لە ئێران چارەسەرێكی بنەڕەتییە.
سازمانی خەباتی كوردستانی ئێران كۆچی دوایی كاک جەلیل بە زیان بۆ جووڵانەوەی ماف‌خوازنەی كوردستان و شۆڕشی ڕەوا لە بەرانبەر دەسەڵاتی ئێران دەزانێ. بە بۆنەی كۆچی دوایی كاک جەلیل گادانی تێكۆشەری دێرینی گەلی كورد، “بابەشێخ حوسەینی”، سكرتێری گشتی و سەركردایەتیی سازمانی خەبات و تێكڕای هاوباوەڕانی سازمانی خەباتی كوردستانی ئێران سەرەخۆشی بە خانەوادەی كاک جەلیل و هەواڵانی لە حیزبی دێموكراتی كوردستان ڕادەگەیەنین و لە غەم و پەژارەیاندا بەشدارین.
سازمانی خەباتی كوردستانی ئێران
١٦ی گەلاوێژی ١٣٩٩ی كۆچی خۆری
