بەڕێز شاڵاوی عەلی عەسکەری، لێپرسراوی مەكتەبی ڕێكخستنی یەكیەتیی نیشتمانی كوردستان بە بۆنەی کۆچی دوایی کاک جەلیل گادانی پەیامێکی پرسە و سەرەخۆشیی ئاراستەی حیزبی دێموکراتی کوردستان و بنەماڵەی گادانی کردوە.
دەقی پەیامەکە
بەڕێزان خانەوادەی تێکۆشەر و خەباتگێڕی جلیل گادانی
بەڕێزان سەرکردایەتیی حیزبی دێموکراتی کوردستان
بە داخێکی زۆرەوە هەواڵی کۆچی دوایی تێکۆشەر، خەباتگێڕ، سیاسەتمەدار و کەسایەتیی دیاری کوردستان و ئەندامی پێشووی ڕێبەریی حیزبی دێموکرات کاک “جلیل گادانی”ـم بیست، بەم بۆنە خەمناکەوە هاوبەشی خەمتان و پرسە و سەرەخۆشیم ئاڕاستەی خانەوادە و بنەماڵە تێکۆشەر و خەباتگێڕەکەتان و سەرکردایەتیی حیزبی دێموکرات دەکەم، خوازیارم دوا کۆستی بنەماڵەکەتان بێ و ڕۆحی پاکی کاک جلیل گادانییش بە بەهەشتی بەرین شاد بێ، خوای گەورە ئارامی و سەبووری بە خانەوادەکەتان بدا.
تێکۆشەر، خەباتگێڕ و سیاسەتمەدارکاک جلیل گادانی تێکۆشەرێکی کۆڵنەدەر و خەباتگێڕێکی ڕووناک فکر و سیاسەتمەدارێکی بە توانا و پڕ ئەزموون بووە و کەسایەتییەکی دیار و نیشتمان پەروەرێکی کورد بوو، ئەو هەموو تەمەنی بەخشییە کورد و کوردایەتی، مێژوویەکی پڕ سەروەری بۆ خۆی و بنەماڵەکەی وگەلەکەی تۆمار کردوە و یەکێک بووە لە دۆستە دێرین و نزیکەکانی سەرۆک “مام جەلال”، بۆیە لەدەستدانی جلیل گادانی داخێکی قوڵ و پڕئازاری خستە دڵی هەموومان.
شاڵاوی علی عەسکەری
لێپرسراوی مەكتەبی ڕێكخستنی یەكیەتیی نیشتمانی كوردستان
