فەزلوڵڵا ڕەنجبەر، فەرمانداری كرماشان گوتی لە حاڵی حازردا ٣٣٠ هەزار كەس لە ناوچەو پەڕاوێزەكانی شاری كرماشانو شارە گەورەکانی دیکەی ئەو پارێزگایەدا دا دەژین.
فەرمانداری كرماشان لە ڕێوڕەسمی كرانەوەی كتێبخانەی گشتیی “سەیدولشوهەدا” لە شاری كرماشاندا گوتی هەژاریی فەرهەنگیو هەژاریی كۆمەڵایەتی، مەترسییەكە بۆسەر ژیانی پەڕاوێزنشینانی ئەم شارە.
بەپێی ئاماری ڕاگەیەندراو لەلایەن ناوەندی ئاماری ئێرانەوە ساڵی ٩٠، كرماشان ٨٥١ هەزار و ٤٠٥ كەسی حەشیمەت بووە.
ڕاگەیەندرانی ئەم هەواڵە كە ٣٣٠ هەزار كەس لە دەرەوەی شاری كرماشانو لە پەراوێزەکاندا دەژین لە حاڵێكدایە كە حوسێن ئیمانی، سەرۆكی ڕێكخراوی توێژینەوەو لێكۆڵینەوەی كۆمەڵایەتیی زانكۆی تاران، لە مانگی خاكەلێوەی ئەمساڵدا گوتبووی كە سەدی ٢٠ی سەرجەم حەشیمەتی ئێران لە پەڕاوێزنشینەكان پێك هاتووە.
كۆچ كردن بۆ شارە گەورەكانو نەبوونی توانای كڕینی خانوو لەم شارانە، لە هۆكارەكانی پەڕاوێزنشینین.
عەبباس ئاخوندی، وەزیری ڕێگەوبان و شارسازیش دەڵێ: لە ئێستادا ١٨ میلیۆن كەس كە دەكاتە ١ لە ٣ی حەشیمەتی ئێران لە بواری نیشتەجێبوونەوە لە دۆخێكی خراپدان كە لەم ڕێژەیە ١١ میلیۆن كەس لە دەرەوەی شارەكانو 7 میلیۆن كەسیش لە نێو شارەكان لە بارودۆخێكی نالەباردا دەژین.
