بەشی زۆری قوتابخانەکانی ئێران و بە تایبەت کوردستان خراپ بوون و لە سەرەتاییترین پێداویستییەکان بێبەشن.
بە گوتەی جێگری وەزیری ئامووزش و پەروەردە و بەرپرسی نوێکردنەوە، فراوانکردن و ئامادەکردنی کەرستەی قوتابخانە، ٣٠٪ی قوتابخانەکانی ئێران پێویستیان بە ڕووخاندن یان پتەوکردن و نوێکردنەوە هەیە. هەروەها ٤٪ی پێداویستیی گەرمکەرەوەی گونجاویان نییە و بە کوورەی نەوتی گەرم دەکرێن.
شایانی باسە، بەشێکی زۆر لە قوتابخانەکانی ئێران بە تایبەت قوتابخانەی ئاوایی و ناوچە سنوورییەکانی کوردستان و سیستان و بەلووچستان خراپ بوون و پێویستییان بە نۆژەنکردنەوە هەیە، زۆربەی کات لە قوتابخانەکاندا ڕووداوی دڵتەزێن بە هۆی داڕمانی دیوارەکان و ئاگرگرتنی کوورەی نەوتی ڕوو دەدا، قوتابخانەی شیناوێ یەکێک لەو قوتابخانانە بوو کە بە هۆی سووتانی کوورەی نەوتی پۆلێک لە قوتابییەکان سووتان و تا ئێستاش بە دەست برینەکانیانەوە دەناڵێنن.
زۆرێک لە قوتابخانەکان لە سەرەتاییترین پێداویستییەکانی وەک گەرمکەرەوە و کەلوپەلی پێویستی خوێندن و بینای باش بێبەشن، لە زۆربەی ناوچەکان قوتابییان لە نێو خێوەت و کانێکس و خانووی ڕووخاودا دەرس دەخوێنن، لە لایەکی تریش کێشەی هاتوچۆ و گەیشتن بە قوتابخانە کێشەیەکی تری قوتابییان لەو ناوچانەیە.
جێی ئاماژەیە سەرەڕای ئاگاداربوونی بەرپرسانی حکوومەت لە دۆخی خراپی قوتابخانەکان، بەڵام تا ئێستا هەنگاوێکی ئەرێنییان بۆ چارەسەرکردنی کێشەکان هەڵ نەهێناوەتەوە.
