كرێكارانی بەنداوی چەپەڕاوای شنۆ بە مەبەستی ناڕەزایەتیی دەربڕین سه‌باره‌ت به وەدواكەوتنی مووچەكانیان مانیان گرت، هەروەها كۆبوونەوەی ناڕەزایەتی ده‌ربڕیینی كۆمەڵێك لە شۆفیرەكانی شیركەتی “غەرب سه‌یر”ی كرماشانیش بەردەوام بوو.
ڕۆژی سێشەممە ١٩ی خەزەڵوەر كرێكارانی بەنداوی چەپەراوای شنۆ بۆ ناڕەزایەتی دەربڕین به پێنەدرانی 9 مانگ مووچەی دواكەوتوویان دەستیان لە كار هەڵگرت‌و مانیان گرت.
ئەم كرێكارانە ڕایانگەیاندووە كە بەهۆی پێبەند نەبوونی كاربەدەستان‌و خاوەنكاری ئەم بەنداوە بە بەڵێنییەكان‌و درۆ كردن و تەفرەدرانیان لە لایەن ئەوانەوە مانیان گرتووەو تا بە مافەكانی خۆیان نەگەن‌و مووچەکانیان نه‌درێتێ، ناگەڕێنەوە سەر كارەكانیان.
كرێكارانی بەنداوی چەپەراوێای شنۆ نزیكەی ١١ ڕۆژە بە هۆی پێبەند نەبوونی كاربەدەستان‌و خاوەنكارەكان بە بەڵێنییەكانیان، بە كردەوە دەستیان لە كار كێشاوەتەوەو بە مانگرتنی خۆیان داوای پێدرانی ٩ مانگ مووچەی دواخراویان ده‌که‌ن.
ئەم كرێكارانە ده‌ڵێن كە تەنیا سەرچاوەی داهاتیان كار كردن لەم بەنداوه‌یه، ئه‌وان ده‌ڵێن لەو کاته‌وه‌ی له‌و به‌نداوه‌دا دەست بە كار بوون، خاوەن كار هەر جارەو بە بیانوویەك لە پێدانی مووچەی كرێكاران لە كاتی خۆی‌دا خۆ دزیوه‌ته‌وه‌و هەموو جارێ وەدوای خستوه، به جۆرێک كە ئێستا ماوەی ٩ مانگە مووچەیان نه‌دراوه‌تێ‌و چی دیكەش ئه‌وه‌یان پێ قەبووڵ ناكرێ، بۆیه بڕیاریان داوه که تا ئەم كاتەی وه‌ڵامی داواكەیان نەدرێتەوە‌و بە ئەنجامێكی باش نەگەن، واز لە مانگرتنه‌که‌یان نەهێنن.
هەر هەمان ڕۆژ لە كرماشانیش كۆمەڵێك لە شۆفیرەكانی شیركەتی “غرب سه‌یر” سەر بە ئیدارەی “راە و ترابری” بۆ ناڕەزایەتی دەربڕین سه‌باره‌ت به تێنەكرانی پارەی بیمەو مووچەی ساڵانەی خۆیان لە سەرەتای ساڵی ٩٤ەوە، لە شەقامی كاشانی كۆبوونەوە.
