تەرخان‌كرانی تەنیا١٠٠ میلیارد تمەن بۆ قەرەبووكردنەوەی سه‌دان میلیارد تمه‌ن زیانی سێڵاوه‌که‌ی ئیلام

لە حاڵێكدا سێڵاوی حەوتووی ڕابردوو پتر لە ١١٠٠ میلیارد تمەنی زیان بە ئیلام‌و ناوچه‌ جیاوازه‌کانی ئه‌و پارێزگایه‌ گەیاندووە، هەیئەتی دەوڵەت بە مەبەستی نۆژەنكردنەوە‌و قەرەبووكردنەوەی ئەم زەرەر و زیانە كە بەهۆی هەستانی ئەم لافاوە تووشی پارێزگای ئیلام هاتووە، تەنیا ١٠٥ میلیارد تمەنی وەبەرچاو گرتووە.
لافاوی حەوتووی ڕابردوو لە پارێزگای ئیلام زیانێكی یەكجار زۆری لە بەشەكانی ژێرخانی شارو دامه‌زراوه‌ ئیدارییه‌کان، خانووبەرە، ڕێگەو بان‌و بەشی جووتیاری شاری ئیلام‌و ناوچەكانی دیكەی ئەم پارێزگایە دا.
پارێزگاری ئیلام پێشتر باسی لە زیانی ٢٥ میلیارد تمەنیی ئەم سێڵاوە كردبوو كە بەر شاری مەلیكشاهی كەوتووە، هەروەها بەڕێوەبەری جیهادی جووتیاریی پارێزگای ئیلام گوتبووی لافاوی حەوتووی ڕابردوو خەسارەتی بە ٨٠٠ هێكتار لە باخ‌و زەوی و زاری جووتیارەكانی ئیلام گەیاندووە. بە قسه‌ی عەبدولڕەزا بازدار بڕی ئەم زیانەی كە بەر بەشی كشتوكاڵی ئەو پارێزگایە كەوتووە زیاتر لە ٨٥ میلیارد تمەن بووە.
لە لایەكی دیكەوە ١٠٨ ئاوایی ئەم پارێزگایەش بەهۆی ئەم ڕووداوە سرووشتییە تووشی زیانێكی لەڕادەبەدەر هاتوون‌و ٢٥ هەزار خانووبەرەش لەم ڕووداوەدا که‌م و زۆر زیانیان پێ گه‌یشتووه‌.
شایانی باسە تەرخان كرانی ١٠٥ میلیارد تمەن لە لایەن دەوڵەتەوە بۆ قەرەبووكردنەوەی زیانی ١١٠٠ میلیارد تمەنیی ئەم لافاوە لە حاڵێك دایە كە چاوەدێرانی سیاسی لە پێدانی ئەم بڕە قه‌ره‌بووه‌ش دڵنیا نین‌و پێیان وایە ئەوەشیان نادەنێ؛ وه‌ک چۆن قه‌ره‌بووی بوومه‌له‌رزه‌که‌ی مورموریش به‌ خه‌ڵکه‌که‌ نه‌درا.